Qazaqstan halyqaralyq baǵytta alǵash ret áıelder vagonyn iske qosady: ony Ózbekstan astanasyna baratyn poıyz jolaýshylary paıdalana alady, dep habarlaıdy infohub.kz saıty.
«Jolaýshylar tasymaly» AQ málimetinshe, №1/2 «Almaty — Tashkent» halyqaralyq poıyzynyń quramyndaǵy áıelder vagony 1 qazannan bastap júre bastaıdy.
«Osy baǵyttaǵy suranys pen jolaýshylar aǵynynyń artýyn eskere otyryp, „Áıelder vagonyn“ iske qosý týraly sheshim qabyldandy. Bul qyzmet ishki temirjol baǵyttarynda da joǵary suranysqa ıe. „Áıelder vagony“ qyzmeti iske qosylǵannan beri ony 946 myńnan astam jolaýshy paıdalandy», — dedi «Jolaýshylar tasymaly» AQ basqarma tóraǵasy Ánýar Ahmetjanov.
Qazir poıyz kún saıyn júredi: Almaty stansıasynan jóneltilýi — 19:05; Tashkent stansıasyna kelýi — 12:53 (Tashkent ýaqyty); Tashkent stansıasynan jóneltilýi — 14:41 (Tashkent ýaqyty); Almaty stansıasyna kelýi — 08:51.
Jańa vagonnyń iske qosylýymen «Áıelder vagony» qyzmeti qoljetimdi baǵyttar sany 14-ke deıin artady: №77/78 «Almaty — Mańǵystaý»; №351/352 «Almaty — Mańǵystaý»; №45/46 «Pavlodar — Túrkistan»; №37/38 «Mańǵystaý — Semeı»; №47/48 «Atyraý — Astana»; №33/34 «Aqtóbe — Almaty»; №3/4 «Astana — Almaty»; №71/72 «Astana — Shymkent»; №353/354 «Astana — Semeı»; №23/24 «Aqtóbe — Almaty»; №25/26 «Almaty — Shymkent»; №613/614 «Oral — Mańǵystaý»; №81/82 «Nurly jol — Oral»; №1/2 «Almaty-2 — Tashkent».
Áıelder vagonynda 7 jasqa deıingi ul balalardyń eresektermen birge júrýine ruqsat etiledi. Mundaı vagondarǵa bıletter tek áıelderge satylady, al olarǵa tek áıel ótkizgishter qyzmet kórsetedi.