Qazaqstandyqtardy áleýmettik jeliler arqyly zańsyz áleýmettik tólemder alý sqemalaryna barǵan saıyn tartyp jatyr: azamattarǵa jalǵan jumysqa ornalasý, áleýmettik aýdarymdardy jasandy túrde kóbeıtý nemese jumysy bar bola tura jumyssyz mártebesin rásimdeý usynylady. 2025 jyly elimizdiń 12 óńirinde zańsyz tólemder alý faktileri boıynsha 30-dan astam qylmystyq is qozǵalyp, onyń jeteýi sot úkimimen aıaqtaldy, dep habarlaıdy infohub.kz saıty.
Eńbek jáne halyqty áleýmettik qorǵaý mınıstrliginiń derekterine sáıkes, bes óńirde osyndaı ister boıynsha jeti sot úkimi shyǵaryldy. Tergeý barysynda azamattardy áleýmettik jelilerdegi habarlandyrýlar men usynystar arqyly zańsyz tólemder alý sqemalaryna tartý faktileri anyqtaldy.
Vedomstvo erekshe atap ótti: áleýmettik tólemderdi taǵaıyndaý úshin azamattarǵa deldaldarǵa júginýdiń nemese úshinshi tulǵalarǵa aqy tóleýdiń qajeti joq. Sheshimdi zańda kózdelgen sharttar men usynylǵan málimetter negizinde Memlekettik áleýmettik saqtandyrý qory qabyldaıdy.
Mınıstrlik tólem alý úshin jalǵan eńbek qatynastaryn rásimdeý nemese durys emes málimetter berý týraly usynystarǵa kelispeýge shaqyrady.
«Áleýmettik tólemdi zańsyz alǵany anyqtalsa, qarajat zańnamada belgilengen tártippen qaıtarylýǵa jatady, al kórineý jalǵan málimetterdi qasaqana berý zańnamaǵa sáıkes jaýapkershilikke ákep soǵýy múmkin», — dep eskertti mınıstrlikte.
Sonymen qatar azamattarǵa jeke kýálik, bank kartasynyń derekterin jáne qupıa banktik aqparatty, SMS-kodtardy, elektrondyq sıfrlyq qoltańbaǵa qatysty málimetterdi jáne basqa da derbes derekterdi bógde adamdarǵa bermeýge keńes beriledi.
Budan bólek, «tólemdi kepildi túrde rásimdep beremin», «ony alýdy jyldamdatamyn» nemese «tólemdi uzartamyn» dep ýáde etkenderdiń qyzmetine aqy tóleýdiń qajeti joq.
Memlekettik áleýmettik saqtandyrý qorynyń derekteri boıynsha, 2026 jyldyń qańtar–tamyz aılarynda 1 mln 64 myń adam áleýmettik tólem aldy. Tólemderdiń jalpy somasy shamamen 527 mlrd teńgeni qurady.
Mindetti áleýmettik saqtandyrý áleýmettik táýekelderdiń alty túri boıynsha tólemderdi kózdeıdi: eńbekke qabilettilikten aıyrylý, asyraýshysynan aıyrylý, jumystan aıyrylý, júktilik jáne bosaný, jańa týǵan náresteni asyrap alý, sondaı-aq bir jarym jasqa deıingi balany kútýge baılanysty tabystan aıyrylý.
Tólemderdi taǵaıyndaý sharttary men tártibin Eńbek jáne halyqty áleýmettik qorǵaý mınıstrliginiń, Memlekettik áleýmettik saqtandyrý qorynyń jáne eGov resmı resýrstary arqyly tekserýge bolady. Qosymsha suraqtar boıynsha 1414 Biryńǵaı baılanys ortalyǵy jumys isteıdi.
Buǵan deıin memlekettik tólemder men járdemaqylar qazaqstandyqtarǵa jasandy ıntellekt kómegimen taǵaıyndalatyny habarlanǵan bolatyn.