Shardjadaǵy jaldamaly páterden eki qazaqstandyq azamatshanyń denesi tabylǵan oqıǵaǵa qatysty jańa málimetter paıda boldy. Qaza tapqandar 20 jáne 22 jastaǵy týǵan ápke-sińliler Juldyz ben Aqjan Bohanovtar ekeni anyqtaldy, dep habarlaıdy infohub.kz.
Qyzdardyń týystarynyń aıtýynsha, olar 2025 jyldyń jeltoqsanynda BAÁ-ge jumys isteý úshin baryp, sulýlyq salonynda jumys istegen. Deneleri tabylǵanǵa deıin shamamen 10 kún buryn olar baılanysqa shyǵýdy toqtatqan.
Qyzdardyń ata-anasyna jibergen sońǵy habarlamasy qysqa bolǵan. «Sálem, mama, bizde bári jaqsy, prostyla, tamaǵym aýyryp tur, keıinirek habarlasamyn», — degen daýystyq habarlama jibergen qyz.
Qaza tapqandardyń ákesi Meıram Bohanov qyzdaryna jibergen habarlamalary oqylǵanymen, jaýap almaǵanyn aıtty. «Dúısenbide jazamyn — oqıdy, biraq jaýap joq. Denelerin ázirge bermeıdi. Bir apta qarastyrylady dedi. Tezirek bolýyn surap jatyrmyz. Olardy jerleý kerek qoı. Olar sonda qansha jatty... Men olardy osynda ákelip, adamsha jerlegim keledi», — dedi ol.
Juldyz ben Aqjannyń buǵan deıin de BAÁ-ge jumys isteýge barǵany belgili boldy, sondyqtan otbasy olarǵa alańdamaǵan. Bul joly ápke-sińliler aqpan aıynda Qazaqstanǵa oralýdy josparlaǵan, alaıda Taıaý Shyǵystaǵy jaǵdaıdyń ýshyǵýyna baılanysty qaıtýdy qyrkúıektiń basyna aýystyrǵan.
Qaza tapqandardyń ápkesi Mensulý Bohanovtyń aıtýynsha, qyzdar elde týrısik vızamen bolmaǵandyqtan, evakýasıa kezinde birden kete almaǵan. «Aldymen týrıserdi evakýasıalady, olar bir aptaǵa ketti. Al olar jeltoqsannan beri sonda boldy, qujattaryn rásimdeý kerek boldy. Birden shyǵa almady. Biraq úıge qaıtqysy keldi. Men aqsha kerek pe, bári jaqsy ma dep suradym. Bári jaqsy edi. Sebebi ne bolýy múmkin ekenin bilmeımin», — dedi ol.
Qyzdardyń óliminiń mán-jaıy ázirge ashylmaı otyr. Týystaryna denelerinde zorlyq-zombylyq izderi tabylǵany týraly da habarlanbaǵan. Otbasy ápke-sińlilerdi óltirýi múmkin dep esepteıdi. Rastalmaǵan aqparat boıynsha, kúdikti ustalǵan, alaıda bul resmı túrde rastalmaǵan.
Qazaqstan Syrtqy ister mınıstrligi tergeýdi BAÁ quqyq qorǵaý organdary júrgizip jatqanyn málimdedi. «Qazaqstannyń Dýbaı qalasyndaǵy Bas konsýldyǵy qajetti konsýldyq-quqyqtyq kómek kórsetýde. Jergilikti bılik oqıǵanyń mán-jaıyn anyqtap jatyr jáne tergeý múddesine oraı aqparatty jarıalamaıdy», — dep habarlady QR SİM.
Qaza tapqandardyń ákesi Astanadan Emırattarǵa ushyp ketti. Týystyqty rastaý úshin ol DNK-test tapsyrýy kerek. Osydan keıin ol qyzdarynyń denelerin alyp, jerleý úshin Qazaqstanǵa jetkize alady.