Qaraǵandy oblysynda Balqashta jasalǵan kisi óltirý jáne kisi óltirýge qastandyq jasady dep aıyptalǵan er adamǵa úkim shyǵaryldy, dep habarlaıdy infohub.kz saıty.
Qaraǵandy oblysy sottarynyń resmı Telegram-arnasynda habarlanǵandaı, sotqa deıingi tergeý organy er adamdy kisi óltirý jáne kisi óltirýge qastandyq jasady dep aıyptaǵan (Qylmystyq kodekstiń 99-babynyń 1-bóligi, 24-babynyń 3-bóligi, 99-babynyń 2-bóliginiń 1-tarmaǵy).
Sot anyqtaǵandaı, 2026 jylǵy 9 mamyrda Balqashta tanysynyń páterinde birge ishimdik ishkennen keıin týyndaǵan jekkórinish sebeptermen sottalýshy balkonda er adamdardyń bireýine birneshe ret pyshaq jaraqatyn salǵan, saldarynan jábirlenýshi qaza tapqan. Osydan keıin ol ekinshi jábirlenýshige qastandyq jasaǵan, ol der kezinde kórsetilgen medısınalyq kómektiń arqasynda ǵana aman qalǵan.
Sottalýshynyń kinási is boıynsha jınalǵan dálelder jıyntyǵymen, atap aıtqanda jábirlenýshiniń, sarapshylardyń, kýágerlerdiń aıǵaqtarymen, sot-medısınalyq jáne sot-bıologıalyq saraptamalardyń qorytyndylarymen jáne qylmystyq istiń basqa da materıaldarymen tolyq dáleldendi.
Qaza tapqan adamnyń jubaıy men jábirlenýshi qatań jaza taǵaıyndaýdy talap etti. Qorǵaýshy tarap er adamdy kinási dáleldenbegendikten aqtaýdy surady.
Kiná men jazany jeńildetetin mán-jaılar anyqtalmaǵan. Qylmystyq jaýaptylyq pen jazany aýyrlatatyn mán-jaılar retinde sot sottalýshynyń аlkogóldik masań kúıde bolýyn jáne qylmystardyń qaýipti resıdıvin tanydy.
Sot úkimimen oǵan túpkilikti 22 jyl bas bostandyǵynan aıyrý jazasy taǵaıyndaldy, jazany qylmystyq-túzeý júıesiniń eń joǵary qaýipsizdik mekemesinde óteıdi.
Jábirlenýshilerdiń moraldyq zıandy óteý týraly azamattyq talaptary tolyq qanaǵattandyryldy: jesiriniń paıdasyna 10 mln teńge, jábirlenýshi er adamnyń paıdasyna 5 mln teńge óndirildi.
Materıaldyq zıandy óteý týraly talaptar sotqa usynylǵan túbirtekter men rastaıtyn qujattarǵa sáıkes ishinara qanaǵattandyryldy. Úkim zańdy kúshine engen joq.