InfoHub Logo

Ulytaý oblysynda kıberpolısıa qyzmetkerleri ınternettegi eń uzaqqa sozylǵan qýdalaýdyń birin áshkereledi. Bes jyl boıy anonımdi akkaýnttar men sıfrlyq maskalardyń artyna tyǵylyp, bir otbasyn maqsat etken shabýylshy áshkerelendi.

Bul týraly Óńirlik polısıa departamentiniń baspasóz qyzmeti habarlady.

Bastapqyda qysym qyzǵa baǵyttalǵan – bopsalaý, qorqytý, jalǵan aqparat taratý. Keıinnen qýdalaý qaýipti deńgeıge kóterildi.

Jasandy ıntellektiniń qoldanylýy

Qylmysker jasandy ıntellekt múmkindikterin paıdalanyp, adamdarǵa uqsas, biraq jalǵan ıntımdik sıpattaǵy foto- jáne beınematerıaldardy jasaǵan. Bul materıaldar jelide taratylyp, týystaryna, tanystaryna jáne basqa da úshinshi tulǵalarǵa jiberilip, aýyr moraldyq jáne repýtasıalyq zıan keltirgen.

Kelisim buzyldy

2023 jyly jábirlenýshiniń úılenetinin bilgen anonım, kúıeý jigittiń otbasyna jala jabatyn jalǵan beınelerdi jibergen. Saldarynan, toı toqtatyldy.

Qaýipsizdikke tóngen qater

Qyz sıfrlyq keńistikten tolyqtaı bas tartýǵa tyrysqanda, shabýyldyń nysany onyń jaqyn týysy boldy. Jelide jalǵan anketalar men materıaldar tarala bastady. Bul otbasynyń, sonyń ishinde kámeletke tolmaǵan balalardyń qaýipsizdigine naqty qater tóndirdi.

Anonımdiktiń buzylýy

Qylmysker óziniń eshkimge qol jetpeıtinine jáne uzaq ýaqyt boıy anonım bola alatynyna senimdi bolǵanymen, kıberpolısıa jedel áreketter arqyly onyń kim ekenin anyqtady.

Jumys barysynda zamanaýı sıfrlyq tehnologıalar, analıtıkalyq quraldar jáne kıberpolısıanyń múmkindikteri qoldanylyp, kóp jyldyq onlaın-presledovanıe artynda turǵan naqty tulǵa anyqtaldy.

Osylaısha, jelidegi tolyq anonımdik týraly ıllúzıa joıyldy. Ustalǵan kúdikti – Sátpaev qalasynyń 22 jastaǵy turǵyny bolyp shyqty. Ol turǵylyqty jeri boıynsha arnaıy jasaq qyzmetkerleriniń qatysýymen ustaldy. Tintý kezinde qylmystyq áreketterde paıdalanylǵan kompúter tehnıkasy men baılanys quraldary tárkilendi.

Ustalǵan azamatqa qatysty qamaýǵa alý túrindegi bultartpaý sharasy tańdaldy. Tergeý onyń basqa da kıberqylmystarǵa qatystylyǵyn tekserýde.