Stepnogorsk qalasyndaǵy №5 mekemede — Qýandyq Bishimbaev jazasyn ótep jatqan kolonıada — kirýdi baqylaýdyń zamanaýı beınedomofondyq júıesi engizilip, jergilikti búdjetten qaladaǵy qylmystyq-atqarý júıesi mekemeleriniń materıaldyq-tehnıkalyq bazasyn nyǵaıtýǵa qarajat bólindi. Bul týraly Bas prokýratýranyń baspasóz qyzmeti Telegram-arnasynda habarlady, dep jazady infohub.kz saıty.
Atalǵan aqparatqa sáıkes, bıyl Stepnogorsk qalasynyń prokýratýrasy jergilikti búdjetten qaladaǵy qylmystyq-atqarý júıesi mekemeleriniń materıaldyq-tehnıkalyq bazasyn nyǵaıtýǵa qarajat bólý máselesin sheshti.
Buǵan deıin habarlanǵandaı, Qýandyq Bishimbaev jazasyn ótep jatqan №5 mekemede qadaǵalaý organy kirýdi baqylaýdyń zamanaýı beınedomofondyq júıesin engizdi. Qajet bolǵanda sottalǵan adam shaqyrý túımesin basady, sodan keıin kezekshi bólimniń qyzmetkeri beınebaılanys arqyly onyń jeke basyn anyqtap, shyǵý maqsatyn naqtylaıdy. Tek rastalǵannan keıin ǵana esik ashylyp, adam ótken soń avtomatty túrde jabylady.
«Júıe sottalǵandardyń baqylaýsyz júrip-turýyn boldyrmaýǵa, ótkizý rejımin kúsheıtýge jáne qyzmetkerler men nysannyń jalpy qaýipsizdik deńgeıin arttyrýǵa múmkindik beredi», — dedi vedomstvoda.
Buǵan deıin YouTube-arnalardyń biri taratqan Bishimbaevtyń kolonıada joqtyǵy týraly aqparat jarıalanǵan bolatyn. Sol kezde Qylmystyq-atqarý júıesi komıteti jaǵdaıǵa túsinikteme berip, sottalǵan adam eń joǵary qaýipsizdik mekemesinde jazasyn ótep jatqanyn málimdedi. Keıinirek Qýandyq Bishimbaevtyń advokaty NUR.KZ-ke qorǵalýshysynyń qazir qaıda júrgenin jáne kolonıadaǵy ustaý jaǵdaıyn aıtyp berdi. Sondaı-aq senat kýlýarlarynda buryn İİM basshysynyń orynbasary bolǵan depýtat Marat Qojaevtan sottalǵan Qýandyq Bishimbaevtyń qalaı jáne qaıda otyrǵany nege kórsetilmeıtini suraldy. Qojaev resmı tulǵalarǵa sený kerektigin, al sottalǵan adam Stepnogorsk qalasyndaǵy eń joǵary qaýipsizdik kolonıasynda ustalyp jatqanyn aıtty.
2023 jylǵy 9 qarashada Astanadaǵy meıramhanalardyń birinde dene jaraqatyn salý saldarynan Qazaqstan Respýblıkasynyń burynǵy ulttyq ekonomıka mınıstri Qýandyq Bishimbaevtyń azamattyq jubaıy Saltanat Núkenova qaza tapty. 12 qarashada Bishimbaev eki aıǵa qamaýǵa alyndy. Núkenova qaza tapqan «Gastrosentr» dırektory Baqytjan Baıjanov ta qamaýǵa alyndy.
Osy is boıynsha tergeý qańtardyń basynda aıaqtaldy. Burynǵy mınıstr Qýandyq Bishimbaev pen onyń aǵasy Baqytjan Baıjanovqa qatysty sot 27 naýryzda bastaldy. Proses ashyq rejımde ótip, onlaın-translásıany barlyq tilegen adam Qazaqstan Respýblıkasy Joǵarǵy sotynyń YouTube-arnasynan kóre aldy. Ekeýin de 12 adamnan turatyn alqabıler soty qarady.
Mamyrdyń ortasynda Qýandyq Bishimbaev Saltanat Núkenovany óltirgeni jáne ony azaptaǵany úshin eń joǵary qaýipsizdik qylmystyq-atqarý júıesi mekemesinde óteıtin 24 jylǵa bas bostandyǵynan aıyryldy. 28 mamyrda Qýandyq Bishimbaevtyń isi boıynsha apelásıalyq shaǵym berildi. 11 maýsymda Bishimbaev pen Baıjanovtyń isi boıynsha apelásıalyq shaǵym Astana sotyna tústi. 26 maýsymda Astana sotynda Qýandyq Bishimbaev pen Baqytjan Baıjanovtyń apelásıalyq shaǵymy boıynsha sot alqasy qabyldaǵan sheshim jarıalandy. Eki sottalǵanǵa da úkim ózgerissiz qaldyryldy.