Batys Qazaqstan oblysynda sot polısıa departamentiniń talap aryzy boıynsha jergilikti turǵynǵa medısınalyq qarsy kórsetilimderge baılanysty kólik júrgizýge tyıym saldy. Anyqtalǵandaı, er adam epılepsıamen esepte tur, dep habarlaıdy infohub.kz saıty.
Sot málimetinshe, qazaqstandyq 2017 jyldyń tamyz aıynda «V» sanatyndaǵy júrgizýshi kýáligin alǵan. Alaıda sot otyrysy barysynda onyń G40.8 — «Epılepsıanyń basqa naqtylanǵan túrleri» dıagnozymen dıspanserlik esepte turǵany anyqtaldy. Dıagnoz qoıý kúni kórsetilmegen.
«Zańnamaǵa sáıkes, júrgizýshiniń densaýlyq jaǵdaıynyń nasharlaýy, kólik quralyn qaýipsiz basqarýǵa kedergi keltiretin jáne medısınalyq qorytyndymen rastalǵan, kólik quraldaryn basqarý quqyǵyn toqtatýǵa negiz bolyp tabylady», — delingen sot habarlamasynda.
Oblystyq sot epılepsıanyń kólik júrgizýge absolútti qarsy kórsetilim ekenin anyqtady. Osyǵan baılanysty BQO turǵynynyń júrgizýshi kýáliginiń qoldanysy toqtatylyp, ol kýálikti oblystyq polısıa departamentine tapsyrýǵa mindetti.
Buǵan deıin Densaýlyq saqtaý mınıstrligi men polısıanyń birlesken tekserýi aýyr medısınalyq qarsy kórsetilimderi bar kóptegen qazaqstandyqtyń kólik júrgizip júrgenin anyqtaǵany habarlanǵan. İİM sottarǵa júrgizýshi kýálikterin joıý týraly 13 myń talap aryz joldaǵan, onyń 7,4 myńnan astamynyń qoldanysy toqtatylǵan.
Oǵan deıin almatylyq áıel áleýmettik jelilerde 65 jastan asqan júrgizýshilerge arnalǵan mindetti medısınalyq tekserýden ótý tájirıbesi týraly aıtyp, dárigerlerdiń is júzinde tekserý júrgizbegenin atap ótken.