Soltústik Qazaqstan oblysyndaǵy Borovskoe aýylynyń turǵyndary jolsyzdyqqa shaǵymdanýda. Joldyń nasharlyǵynan aýyldan tysqary jerge shyǵý qaýipti bolyp otyr. Bul týraly infohub.kz saıty habarlaıdy.
Aýylda 53 úı bar, onda 140 adam turady, onyń kópshiligi zeınetkerler. «Jolymyz tym nashar. GAZel beriledi, bir aıdan keıin jańa GAZel synady. Jańbyr jaýyp, odan keıin GAZel múldem kelmeı qaldy. Turmys toqtady. Adamdar qaıǵyryp otyr. Únemi júrip, ómirińnen qorqasyń. Osy gazel kez kelgen sátte aýdarylyp ketýi múmkin. Qaladan 30 shaqyrym jerde turyp, 300 shaqyrymdaı azap shegemiz», – deıdi turǵyn Natalá Ilınyh.
Joldyń nasharlyǵynan aýylǵa jedel járdem jete almaıdy, taksı júrgizýshileri kelýden bas tartady. Jergilikti kásipkerler de zardap shegip otyr. «Fırmalar bizge taýar jetkizgisi kelmeıdi, joldyń nasharlyǵyna baılanysty. Olar jaman jolǵa jetip, keıin qaıtyp ketedi. Taýar kelmeıdi. Keıde tipti nandy da jetkizbeıdi. Halyq birneshe ret nansyz, taýarsyz, jemis-kókónissiz qalǵanyna shaǵymdanady», – deıdi dúken satýshysy Marına Nemchenko.
Aýyldyq okrýg ákimdiginiń habarlaýynsha, ishki aýyldyq joldar men kireberis joldardy qıyrshyq taspen tóseýge joba-smetalyq qujattama byltyrdan beri daıyn. «Borovskoeǵa aparatyn kireberis jol – aýdandyq mańyzy bar jol. Novosıbırsk – Chelábınsk trassasynan 4,5 shaqyrym. İshki aýyldyq joldar Peterfeld aýyldyq okrýgine qaraıdy. Jobalar bar, 30-40 mıllıon teńgege deıin. Shamamen 70 mıllıon teńge shyǵady. Biraq bıyl qarajat bólinbedi», – dep túsindirdi Peterfeld aýyldyq okrýginiń ákimi Asylhan Qasymov.
Ákimniń aıtýynsha, aýdannyń basqa eldi mekenderinde de osyndaı jaǵdaı qalyptasqan. Borovskoe turǵyndary máseleniń jaqyn arada sheshiletinine úmittenedi.