2026 jyldyń 1 qyrkúıeginen bastap Mańǵystaý oblysynda erekshe qorǵalatyn tabıǵı aýmaqtarǵa, onyń ishinde áıgili Bozjyra shatqalyna barýdyń jańa tarıfteri men erejeleri engiziledi. Tıisti qaýlyny ákimdik 20 shildede bekitti, dep habarlaıdy infohub.kz saıty.

Ózgerister «Qyzylsaı» memlekettik óńirlik tabıǵı parki men Beıneý aýdanynyń ormandar men janýarlar dúnıesin qorǵaý mekemelerine áser etedi. Jańa baǵa qoldanylatyn tanymal oryndar tizimine Bozjyra, Tuzbaıyr, Qyzylqup shatqaldary jáne Boqty taýy kirdi.

Aqy tek kirý úshin ǵana emes, sonymen qatar jekelegen qyzmetter úshin de alynady: týrısik joldar, kempıngterde ornalasý, kólikpen kirý, foto jáne beınetúsirilim. Quny aılyq eseptik kórsetkishke (AEK) negizdelgen.

Máselen, týrısik jolmen serýendeý adam basyna táýligine 0,2 AEK (865 teńge), kempıngte nemese shatyrly lagerde ornalasý — 0,1 AEK (shamamen 433 teńge), fototúsirilim — 4,4 AEK (19 030 teńge), kıno jáne beınetúsirilim — 8,7 AEK (37 627,5 teńge) turady. Ekskýrsıa uıymdastyrý 1,8 AEK (7 785 teńge), gıd qyzmeti — 0,9 AEK (3 893 teńge). Týrısik shatyrdy jalǵa alý — 0,7 AEK (3 028 teńge), uıyqtaıtyn qap — 0,3 AEK (1 298 teńge).

Avtokólikter úshin jeke tarıfter qarastyrylǵan: motosıkl, moped nemese kvadrosıklmen kirý úshin 0,4 AEK (1 730 teńge), jeńil avtomobıl — 0,7 AEK (3 028 teńge), mıkroavtobýs nemese júk kóligi — 2,7 AEK (11 678 teńge), avtobýs — 5 AEK (21 625 teńge) tóleýge týra keledi. Sondaı-aq avtomobıl turaǵy úshin aqy belgilengen — 0,2 AEK (865 teńge).

Mysaly, eki eresek pen 6-17 jas aralyǵyndaǵy eki oqýshydan turatyn otbasy jeńil kólikpen kelip, túnep, týrısik joldardy paıdalansa, shamamen 7 787 teńge tóleıdi. Shatyrdy jalǵa alsa, soma 10 815 teńgege deıin ósedi.

Keıbir azamattar aýmaqtarǵa tegin kire alady: zeınetkerler, múgedektigi bar adamdar, Uly Otan soǵysynyń ardagerleri, basqa memleketter aýmaǵyndaǵy urys qımyldarynyń ardagerleri, eńbek ardagerleri jáne UOS qatysýshylaryna teńestirilgen ózge de sanattar. Alty jasqa deıingi balalar da aqydan bosatylady. Mektep oqýshylary men 6-17 jas aralyǵyndaǵy balalarǵa 50% jeńildik, kúndizgi oqý nysanyndaǵy stýdentterge — 25% jeńildik qarastyrylǵan. Shetel azamattary eki ese kóp tóleıtin bolady.

Qaýly sondaı-aq qorǵalatyn aýmaqtarda bolý erejelerin, onyń ishinde júrý, demalý jáne tabıǵı resýrstardy paıdalaný tártibin bekitedi. 2026 jyldyń 1 qyrkúıegine deıin burynǵy tarıfter men erejeler qoldanylady.

Jańalyq áleýmettik jelilerde qyzý pikirtalas týdyrdy. Paıdalanýshylar, ásirese, aqynyń tek sheteldikter úshin emes, jergilikti turǵyndar úshin de engizilýine tańdanys pen narazylyq bildirýde. «Myna aqy qandaı qajettilikke jáne kimniń qaltasyna túsedi eken», «Qorqynyshty. Osy qarqynmen jaqynda teńizge tegin jaqyndaı almaımyz — tek aldyn ala jazylyp, kirý aqysyn tólep», «Teńizge qaraýǵa da aqy tóletińder», — dep jazady paıdalanýshylar.

Buǵan deıin «Kaspı» áleýmettik-kásipkerlik korporasıasy Mańǵystaý oblysynda glempıngter salýǵa 500 mln teńge tartatyny habarlanǵan bolatyn.