Soltústik Qazaqstan oblysynda «Býlaev sý» jaýapkershiligi shekteýli seriktestiginiń 51% úlesi memleket menshigine qaıtaryldy. Bul kásiporyn Býlaevo qalasynyń turǵyndaryn sýmen jabdyqtaıdy, dep habarlaıdy infohub.kz saıty.
Qadaǵalaý organynyń resmı saıtynda jazylǵandaı, Maǵjan Jumabaev aýdanynyń prokýratýrasy turǵyn úı-kommýnaldyq sharýashylyq jáne memlekettik múlikti paıdalaný salasyndaǵy zańdylyq jaı-kúıine taldaý júrgizgen. Onyń qorytyndysy boıynsha 2017 jylǵy elektrondyq aýksıonnyń qorytyndylaryn jáne «Býlaev sý» JSHS jarǵylyq kapıtalyndaǵy 51% úlesti satyp alý-satý shartyn jaramsyz dep taný týraly talap qoıý engizilgen.
Sotta prokýror «AUHAL» JSHS «Býlaev sý» JSHS-degi 51% úlesti satyp alǵanymen, is júzinde kásiporyn jumysyna qatyspaǵanyn jáne sý qubyry jelilerin ustaý men damytýǵa qarajat salmaǵanyn dáleldedi. Al olardy ustaýǵa jáne apattyq-qalpyna keltirý jumystaryna ketken negizgi shyǵyndar is júzinde Maǵjan Jumabaev aýdany ákimdiginiń búdjeti men resýrstary esebinen ótelgen.
«Nátıjesinde Býlaevo qalasynyń turǵyndaryn sýmen jabdyqtaıtyn kásiporyn kúrdeli qarjylyq jaǵdaıda qaldy, al onyń turaqty jumysyn qamtamasyz etý júgi is júzinde memleketke artyldy», — dep atap ótti Soltústik Qazaqstan oblysynyń prokýratýrasynda.
Soltústik Qazaqstan oblysynyń mamandandyrylǵan aýdanaralyq ekonomıkalyq sotynyń 2026 jylǵy 21 shildedegi sheshimimen aýdan prokýrorynyń talap qoıýy qanaǵattandyryldy. 2017 jylǵy elektrondyq aýksıonnyń qorytyndylary men «Býlaev sý» JSHS jarǵylyq kapıtalyndaǵy 51% úlesti satyp alý-satý sharty jaramsyz dep tanyldy.
Osylaısha, Býlaevo qalasynyń turǵyndaryn sýmen jabdyqtaıtyn múlik memleketke qaıtaryldy.
«Memlekettik múliktiń qaıtarylýy kásiporyndy neǵurlym tıimdi basqarýǵa, onyń qyzmetin baqylaýdy kúsheıtýge, sý qubyry jelilerin jańǵyrtýǵa qajetti resýrstardy jumsaýǵa jáne kórsetiletin komýnaldyq qyzmetterdiń sapasyn arttyrýǵa múmkindik beredi», — dep qosty qadaǵalaý organynda.