Qazaqstanda 500-den astam dárilik zattyń quny tómendegeni tirkeldi. Bul — dári-dármek baǵasyna júıeli monıtorıń júrgizýdiń nátıjesi, dep habarlaıdy infohub.kz saıty.
Atap aıtqanda, ınfeksıalyq, júrek-qan tamyrlary aýrýlaryn, sondaı-aq asqazan-ishek joldarynyń dertterin emdeýde keńinen qoldanylatyn preparattar arzandady. Tekserý qorytyndysy boıynsha, 147 ataý 20%-dan astamǵa, 198-i 10–20%-ǵa, al taǵy 244 dári 5–10%-ǵa qoljetimdi boldy. Qalǵan 1267 preparattyń baǵasy ózgerissiz qaldy.
«Qazir áleýmettik jeliler qarqyndy damyǵan tusta kóptegen dárilik preparattar jarnamalanyp, habarlandyrýlar arqyly satylýda, alaıda olar tirkelmegen bolýy múmkin. Mundaı faktilerge tap bolsańyz, bizge habarlasyńyz. Zań boıynsha árbir preparat tirkeýden ótýi tıis. Memlekettik baǵa retteýine 3039 resept boıynsha beriletin dárilik zat jatady», — dedi QR Densaýlyq saqtaý mınıstrligi Medısınalyq jáne farmasevtıkalyq baqylaý komıteti departamentiniń basshysy Dámir Dáýletbaev.
Tutynýshylar preparat qunyn ózderi de teksere alady. Eger dárihanadaǵy baǵa kúmán týdyrsa, ony NAQTY ONIM mobıldi qosymshasy arqyly salystyrýǵa bolady. 2024 jyldyń 1 shildesinen keıin shyǵarylǵan qaptamalarǵa arnaıy Data Matrix kody basylady. Ony smartfon kamerasymen skanerlegende paıdalanýshy óndirýshi, tirkeý derekteri, tańbalaý mártebesi jáne taýardyń jetkizý tizbegi boıynsha qozǵalysy týraly aqparat alady.
«Qosymsha taýarlardy sıfrlyq tańbalaý men qadaǵalaýdyń memlekettik júıesi aıasynda ázirlendi. Ony qoldaný farmasevtıkalyq naryqtyń ashyqtyǵyn arttyrýǵa yqpal etedi. Paıdalanýshy osy qosymsha arqyly preparattyń qunyn bilip, ony dárihanadaǵy baǵamen salystyra alady», — dedi QR DSM Medısınalyq jáne farmasevtıkalyq baqylaý komıteti bóliminiń basshysy Jámılá Mádımarova.
Elde qatar túrde kontrafaktilik jáne tańbalanbaǵan dárilerdi anyqtaý men alyp tastaý jumystary kúsheıtilýde. 2026 jyldyń birinshi jartyjyldyǵynda shekti baǵanyń asyp ketýiniń alty jaǵdaıy anyqtaldy. Buzýshylarǵa qatysty ákimshilik sharalar qoldanylyp, salynǵan aıyppuldardyń jalpy somasy 1,4 mıllıon teńgeni qurady.