Qazaqstannyń halyq ártisi Dımash Qudaıbergen Qaraǵandydaǵy konsertten keıin 700 metr tereńdikke túsip, kenshilerdi kásibı merekelerimen jeke ózi quttyqtady, dep habarlaıdy infohub.kz saıty.
Kenshiler kúnine arnalǵan, shamamen 250 myń kórermen jınaǵan konsertten keıin ánshi Qarmet kompanıasynyń Kostenko atyndaǵy shahtasyna bardy. Ol áleýmettik jelidegi paraqshasynda áserimen bólisti: "Jer astyna 700 metr tereńdikke tústim, kenshilerdiń qandaı jaǵdaıda jumys isteıtinin, bul qanshalyqty qıyn ári jaýapty eńbek ekenin óz kózimmen kórdim. Maǵan shahtanyń jumysyn, jer astyndaǵy adamdardyń ornyn baqylaýǵa múmkindik beretin zamanaýı qaýipsizdik júıeleri men pozısıalaý júıelerin kórsetti. Shahtalardyń jańaryp jatqany qýantady. Biraq eń bastysy - kenshilermen jeke kezdesip, olardy kásibı merekemen quttyqtaý múmkindigi boldy. Bul mamandyq ıelerine zor qurmet. Sizderdiń eńbekterińiz erekshe qurmetke laıyq! Kenshiler kúni qutty bolsyn! Myqty densaýlyq, amandyq jáne qaýipsiz aýysymdar tileımin!".
Ártis jankúıerleri túsiniktemelerde onyń bul áreketine tánti bolyp, oǵan densaýlyq pen shyǵarmashylyq shabyt tiledi. Eske salaıyq, buǵan deıin Dımash qazan aıyna deıin úzilis alatynyn habarlaǵan edi.