Eýrazıalyq ekonomıkalyq odaq elderinen ákelinip, Qazaqstanda ýaqytsha esepte turǵan kólik ıeleri bes jyldyq merzim bitken soń onyń taǵdyryn sheshýge májbúr. Bir nusqa — ýaqytsha esepten keıin kólikti 200 myń teńgege bastapqy tirkeý arqyly zańdastyrý, dep habarlaıdy infohub.kz saıty.
Ýaqytsha tirkeý merzimi bes jyldy quraıdy, sondyqtan osy sqema boıynsha rásimdelgen alǵashqy jeńil kólikter, shaǵyn avtobýstar men jeńil júk kólikteri 2028 jyldyń jazynda shekti merzimge jetedi.
Bes jyldan keıin ne isteý kerek
Kólik ıesi ony Qazaqstannan shyǵara alady nemese elde turaqty esepke qoıa alady. Ekinshi nusqa úshin mynalar qajet:
kólikti ýaqytsha esepten shyǵarý;
ony burynǵy esepke alynǵan elde tirkeý máselesin sheshý;
ýaqytsha tirkeýden keıin zańdastyrý rásiminen ótý.
Bastapqy tirkeý alymy 200 myń teńgeni quraıdy, bul rette ýtılsbor alynbaıdy. Qosymsha tirkeý kýáligi men memlekettik nómir belgileri úshin tóleýge týra keledi. Jeńildik mólsherlemesin qoldaný úshin kólik arnaıy rejım talaptaryna saı bolýy tıis. Atap aıtqanda, úkimettiń №13 qaýlysynyń talaptaryna sáıkes keletin kólikter týraly aıtylyp otyr.
Tirkeý merzimi bitken soń ne bolady
Ýaqytsha esep merzimi aıaqtalǵan soń kýálik kúshin joıady. Jańa qujattar rásimdelgenge deıin mundaı kólikti Qazaqstan aýmaǵynda paıdalanýǵa bolmaıdy. Tirkelmegen kólikti basqarǵany úshin 10 aılyq eseptik kórsetkish (2026 jyly 43 250 teńge) mólsherinde aıyppul salynady, al kóliktiń ózi buzýshylyq joıylǵansha arnaıy turaqqa qoıylýy múmkin.
Osylaısha, 2022 jyldyń 1 qyrkúıegine deıin ákelingen kólik ıeleri ýaqytsha tirkeý merzimi qashan bitetinin aldyn ala tekserip, odan ári qandaı nusqany tańdaıtynyn sheshken jón.
Buǵan deıin «Kýrsıv Avto» Qazaqstanda EAEO-dan ákelingen kólikterdiń ýaqytsha tirkeý merzimi bitip kele jatqanyn habarlaǵan.