FlyArystan áýekompanıasynyń jolaýshysy Almaty áýejaıynda qol júgin tekserý kezinde qaldyrylǵan jeke zattarynyń qaıda ketkenin bile almady, — dep habarlaıdy infohub.kz saıty.
Threads áleýmettik jelisinde sqwwws___ logınimen jarıalanǵan jazba talqylanyp jatyr. Avtor anasynyń basynan ótken jaǵdaıdy baıandady. Áıeldiń aıtýynsha, anasy aldyn ala onlaın tirkeýden ótken, alaıda ushý aldynda ornyn eshbir túsiniktemesiz 12F-ke aýystyryp qoıǵanyn baıqaǵan.
«Ushý kezinde qol júgin ólshedi. Ruqsat etilgen salmaq — 7 kg, artyq salmaq anyqtaldy. Anam qosymsha aqy tóleýge daıyn boldy, sońynda 9 myń teńge tóledi. Biraq artyq salmaqqa baılanysty qaldyrýǵa bolatyn zattardy ne isteý kerektigi suralǵanda, qyzmetker eger olardy qaldyrsa, laqtyryp tastalatynyn aıtty», — delingen jazbada.
Jarıalanym avtory sóz bolǵan zattardyń ishinde noýtbýk sıaqty qundy zattar da bar ekenin atap ótti. «Tipti noýtbýk sıaqty qundy zat bolsa da. Biz shoshyp qaldyq. Jolaýshynyń jeke zaty artyq salmaqqa baılanysty qalaısha kádege jaratýǵa ketýi múmkin? Ásirese noýtbýk qandaı da bir qoqys retinde qarastyrylmaýy kerek qoı. Sońynda anam tek alma men kámpıtterdi qaldyrdy», — dep jazylǵan jazbada.
Onyń aıtýynsha, keıin ol anasymen de, áýekompanıa men áýejaı qyzmetkerlerimen de telefon arqyly sóılesken. Olar keıin qaldyrylǵan zattardy alýǵa bolatyn oryndy izdedi, biraq ol múmkin bolmady. Sondaı-aq otbasy qaldyrylǵan zattardyń qaıda ketkenin bile almady.
«Qyzmetker zattardy, múmkin, tazalaýshy áıel alyp ketken bolar dep boljady. Keshirińiz, biraq qalaı? Jolaýshynyń jeke zattary qalaısha tazalaýshy áıelde bolýy múmkin? Olar qaıda tirkeledi? Qaıda tapsyrylady? Olarǵa kim jaýapty? Bizge jaýap kútýdi aıtty. Biz kúttik, biraq qyzmetker ketip, ornyna basqa qyzmetker keldi. Biz bárin qaıta túsindirdik. Sonda mynadaı jaýap aldyq: "Biz saqtamaımyz, barlyq zattar kádege jaratylady". Sońynda anam artyq salmaq úshin aqy tólep ushyp ketti, al qaldyrylǵan zattardy ala almadyq, biraq olardy birden alýǵa daıyn edik jáne birneshe ret qaıda ekenin bilýge tyrystyq», — dep suraq qoıdy jazba avtory.
Ol jolaýshy qaldyrǵan zattardyń qaıda jiberiletinin surady. «"Noýtbýkti de laqtyramyz", "eshteńe qaldyrmadyq", "múmkin, tazalaýshy áıel alyp ketken" jáne sońynda "bári kádege jaratylady" degen jaǵdaı óte kóp suraq qaldyrdy», — dep qorytyndylady avtor.
Jarıalanymǵa FlyArystan áýekompanıasy jaýap berdi. «FS7191 reısinde jolaýshynyń orny qaýipsizdik talaptaryna sáıkes 16F-ten 12F-ke aýystyryldy. Oryn aýystyrý týraly jolaýshyǵa áýekompanıa qyzmetkerleri ushý aldynda habarlady. Ushý kezinde jolaýshynyń qol júginde artyq salmaq anyqtaldy. Jolaýshy belgilengen normany 7-den 10 kg-ǵa deıin ulǵaıtyp, 11 myń teńge tóledi. Qol júgin belgilengen normaǵa sáıkestendirý kezinde azyq-túliktiń bir bóligin jolaýshy ózi qaldyrdy. Bul rette noýtbýk pen qalǵan jeke zattaryn jolaýshy ushaq bortyna ózimen birge alyp ketti. Áýekompanıa jolaýshynyń ushý kezeńinde qaldyrǵan zattary úshin jaýapkershilik kótermeıdi», — dep jaýap berdi avtorǵa.