Qostanaı turǵyny 955 myń teńgege jıhaz tapsyrys berip, 684 myń teńgesin aldyn ala tólegen. Alaıda tapsyrys oryndalmaı, daý sotta medıasıalyq kelisimmen aıaqtaldy, dep habarlaıdy infohub.kz saıty.
Qostanaı oblysy sottarynyń resmı Telegram-arnasynda habarlanǵandaı, Qostanaı qalalyq soty áıeldiń jeke kásipkerge qarsy shartty buzý, aqsha óndirý, ósimpul jáne moraldyq zıandy óteý týraly talap aryzy boıynsha azamattyq isti qarady.
Sot taraptar arasynda korpýstyq jıhaz jasaýǵa shart jasalǵanyn anyqtady. Shart boıynsha tapsyrys quny 955 myń teńge, al jasaý merzimi 25 kún bolǵan.
Shart talaptaryn oryndaý úshin talap qoıýshy 684 myń teńge tóledi. Alaıda jaýapker belgilengen merzimde buıymdy jasap, tapsyrý mindettemesin oryndamady.
Talap qoıýshy jaýapkerge sharttyq mindettemelerdi oryndaýdy ne aqshany qaıtarýdy birneshe ret talap etti. Keıin jaýapker 400 myń teńgesin qaıtardy. Qalǵan qaryz somasy 284 myń teńgeni qurady.
Sharttyq mindettemelerdiń tıisinshe oryndalmaýyna baılanysty talap qoıýshy sotqa júginip, ósimpul men moraldyq zıandy óteýdi de surady.
İsti qaraý barysynda taraptar daýdy medıasıa tártibimen retteý týraly kelisimge keldi.
Sot bekitken kelisim boıynsha talap qoıýshy jaýapker kelisilgen mindettemelerdi oryndaǵan jaǵdaıda óz talaptarynan bas tartty.
Jaýapker talap qoıýshyǵa qaryz somasy men ókil shyǵystaryn qosa alǵanda 434 myń teńgeden astam aqsha tóleýge mindettendi.
Mindettemeler ýaqtyly oryndalmaǵan jaǵdaıda kelisimde qaryzdy májbúrlep óndirý, sondaı-aq 42 myń teńgeden astam ósimpul men 150 myń teńge moraldyq zıandy óteý kózdelgen. Bul jaǵdaıda jalpy mindetteme somasy 627 myń teńgeden asady.
Sot kelisim sharttaryn tekserip, ol zań talaptaryna qaıshy kelmeıtinin jáne taraptardyń quqyqtary men zańdy múddelerin buzbaıtynyn anyqtady.
Daýdy medıasıa tártibimen retteý týraly kelisim sotpen bekitilip, azamattyq is boıynsha is júrgizý toqtatyldy.