Ekibastuzda erekshe qajettilikteri bar balaǵa qatygezdik tanytqan 20 jastaǵy stýdentke qatysty rezonanstyq sot prosesi aıaqtaldy. Ońaltý ortalyǵynda jattyqtyrýshy bolyp jumys istegen jigit kináli dep tanyldy, alaıda dereý jazadan bosatyldy, dep habarlaıdy infohub.kz saıty.
Oqıǵa ońaltý ortalyǵynda bolǵan. Aıyptalýshy jergilikti kolejdiń dene shynyqtyrý jáne sport kafedrasynyń stýdenti retinde balalarmen sabaq ótkizgen. Beınebaqylaý kameralary jigittiń qyzdy qolynan súırep, basyna soqqy bergenin kórsetken. Saldarynan dárigerler balada aýyr jaraqat anyqtaǵan.
Sot otyrysynda aıyptalýshy óz kinásin moıyndamaı, zıan keltirý nıeti bolmaǵanyn aıtty. Ol qyz ony tistep alǵandyqtan, soqqy reflektorlyq bolǵanyn túsindirdi. "Sondaı-aq aıtqym keledi, men adam retinde Aılananyń erekshe bala ekenin, kishkentaı bala ekenin túsinemin. Mende sanalylyq bar jáne men eshqashan oǵan ádeıi zıan keltirmes edim, Aılananyń anasy aıtqandaı, ádeıi betinen urmas edim. Bul reflektorlyq qozǵalys boldy, óıtkeni ol meni tistep aldy. Men muny ózim de kútken joqpyn", - dedi aıyptalýshy.
Memlekettik aıyptaýshy bir jyl bas bostandyǵyn shekteý jáne eki jylǵa pedagogıkalyq qyzmetpen aınalysýǵa tyıym salý jazasyn taǵaıyndaýdy surady. Jábirlenýshi tarap 10 mıllıon teńge kóleminde moraldyq ótemaqy talap etti. Alaıda sot barlyq taraptardy tyńdap, basqa sheshim qabyldady. "Sot ony QR QK 140-baby 2-bóliginde kózdelgen qylmys jasaǵany úshin kináli dep tanyp, oǵan kámeletke tolmaǵandarmen jumys isteýge baılanysty pedagogıkalyq laýazymdardy atqarý quqyǵynan aıyra otyryp, bir jyl merzimge bas bostandyǵyn shekteý jazasyn taǵaıyndady. QR 2026 jylǵy 1 shildedegi jańa Konstıtýsıanyń qabyldanýyna baılanysty raqymshylyq týraly Zańynyń 1-baby 1-tarmaǵynyń 1 jáne 4 tarmaqshalary negizinde negizgi jazadan bosatylsyn", - dep oqydy Pavlodar oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń sýdıasy Juldyz Kamalova.
Sonymen qatar, sot 10 mıllıonnyń ornyna 500 myń teńge kóleminde moraldyq ótemaqy tóleýdi jáne jábirlenýshi taraptyń advokattarǵa ketken shyǵyndaryn óteýdi mindettedi. Qyzdyń ata-anasy úkimmen kelispeı, ony tym jumsaq dep sanaıdy. Anasynyń aıtýynsha, oqıǵadan keıin balanyń damýynda keri ketý bolǵan, otbasynyń ońaltýǵa salǵan barlyq kúsh-jigeri zaıa ketken. "Moraldyq zıanǵa keler bolsam, shynymdy aıtsam, qyzymnyń kórgen azabyn 500 myń teńgege baǵalaı almaımyn. Bul tusta men onsha qanaǵattanbaımyn. Taǵy bir másele - ol beıtanys er adamdardan qorqady, júıkesi tozyp, qashady, qazirgi ýaqytta uıqysynyń buzylýy da ózekti", - dedi jábirlenýshi qyzdyń anasy Samal Nýrasheva.
İs boıynsha tergeý segiz aıǵa sozyldy, al otbasynyń advokattarǵa ketken shyǵyndary 1,3 mıllıon teńgeden asty. Apelásıalyq shaǵym berý máselesi ázirshe sheshilmegen.