Qaraǵandydaǵy qylmystyq ister jónindegi sot alqasy bokstan olımpıada chempıony Danıar Eleýsınovtiń eki áıeldi uryp-soqqany úshin sottalǵan áıeliniń qorǵaýshysynyń apelásıalyq shaǵymyn qarap, birinshi satydaǵy sottyń úkimin ózgerissiz qaldyrdy, dep habarlaıdy infohub.kz saıty.
Qaraǵandy oblysy sottarynyń resmı Telegram-arnasynda jazylǵandaı, 14 qyrkúıekte qylmystyq ister jónindegi sot alqasy sottalǵan áıelge qatysty qylmystyq isti qarady. İs materıaldaryna sáıkes, 2026 jylǵy 27 qańtarda saǵat 21:10 shamasynda ol atasynyń qorlanǵanyn anyqtaý úshin eki áıeldiń páterine kelip, týyndaǵan janjal barysynda olardy uryp-soǵyp, basqa da zorlyq-zombylyq áreketterin jasap, jábirlenýshilerge dene jaraqatyn keltirgen.
Birinshi satydaǵy sottyń úkimimen ol Qylmystyq kodekstiń 109-1-babynyń 2-bóliginiń 1-tarmaǵynda kózdelgen qylmystyq quqyq buzýshylyq jasaǵany úshin kináli dep tanylyp, oǵan 100 aılyq eseptik kórsetkish mólsherinde, ıaǵnı 432 500 teńge aıyppul jazasy taǵaıyndaldy. Sonymen qatar sottalǵan áıelden ár jábirlenýshiniń paıdasyna 500 myń teńgeden moraldyq zıan ótemaqysy, sondaı-aq ókil qyzmetine 1 mıllıon teńge shyǵys óndirildi.
«Sot alqasy sottalǵan áıeldiń qorǵaýshysynyń apelásıalyq shaǵymy boıynsha túsken qylmystyq isti apelásıalyq tártippen qaıta qarap, birinshi satydaǵy sottyń úkimin ózgerissiz qaldyrdy. Birinshi satydaǵy sottyń úkimi zańdy kúshine endi», — dedi sotta.
Eske salaıyq, boksshy Danıar Eleýsınovtiń áıeliniń qatysýymen bolǵan oqıǵa osy jyldyń qysynda Maıqudyqtaǵy bir úıde bolǵan. Bul rezonans týdyrǵan is boıynsha úkim jazda shyǵarylǵan.