Qazaqstanda jumystan aıyrylý jaǵdaıyna baılanysty tólemderdiń eń uzaq merzimin qysqartý ýaqyty shegerildi: buryn aıtylǵandaı 2026 jylǵy 1 qazan emes, jańashyldyq 2027 jylǵy 1 qańtardan bastap kúshine enedi. Bul týraly Eńbek jáne halyqty áleýmettik qorǵaý mınıstrligine silteme jasaı otyryp, infohub.kz saıty habarlaıdy.
Vedomstvonyń baspasóz qyzmeti túsindirgendeı, 1 qazannan bastap mınıstrlik jumys izdep júrgen azamattarǵa qyzmet kórsetý tásilderin jetildirý jumysyn kezeń-kezeńimen bastaıdy. Elde pılottyq joba iske qosylady, onyń aıasynda azamattardy súıemeldeýdiń jańartylǵan algorıtmi pysyqtalyp, mansap ortalyqtary men Memlekettik áleýmettik saqtandyrý qory fılıaldarynyń mamandary oqytylady.
Jańa tásildiń basty mindeti — jumysqa ornalasýǵa kómektesýdi neǵurlym naqty, sapaly ári eń aldymen azamattyń naqty jumysqa ornalasýyna baǵyttalǵan etý.
«Negizgi ózgeristerdiń biri — jumyssyz mártebesin bergenge deıin laıyqty jumys izdeý merzimin 2 kúnnen 13 kúnge ulǵaıtý. Bul merzim mansap ortalyǵynyń mamandaryna azamattyń kásibı tájirıbesin, daǵdylary men qajettilikterin neǵurlym egjeı-tegjeıli anyqtaýǵa, profıldeý júrgizýge, laıyqty bos oryndardy tańdaýǵa, jumys berýshilermen ózara is-qımyldy uıymdastyrýǵa múmkindik beredi. Osylaısha, azamattyń mansap ortalyǵyna júginýi tirkeýdiń formaldy rásimi retinde emes, túpki maqsaty jumysqa ornalasý bolyp tabylatyn tolyqqandy mansaptyq baǵyt retinde qarastyrylatyn bolady», — dep túsindirdi mınıstrlikte.
Aıta keteıik, pılottyq joba bir mezgilde jumyspen qamtý júıesin odan ári ózgeristerge praktıkalyq daıyndaý kezeńi bolady. Pılot barysynda mansap ortalyqtary men Memlekettik áleýmettik saqtandyrý qory fılıaldarynyń mamandary jańartylǵan bıznes-prosester men azamattarmen jumys algorıtmderi boıynsha qosymsha oqytýdan ótedi.
«Pılot ótkiziletin kezeńde jumystan aıyrylý jaǵdaıyna baılanysty áleýmettik tólem qoldanystaǵy tártipke sáıkes beriledi. Atalǵan tólemge quqyǵy bar azamattar ony zańnamada belgilengen sharttarmen alý múmkindigin saqtaıdy. Qazaqstan Respýblıkasynyń Áleýmettik kodeksine tıisti túzetýler 2026 jylǵy 11 maýsymda bekitilgen Qazaqstan Respýblıkasynyń Zańymen kózdelgen. 2027 jylǵy 1 qańtardan bastap jumystan aıyrylý jaǵdaıyna baılanysty áleýmettik tólemdi berýdiń eń uzaq merzimi zańnamada belgilengen sharttarǵa sáıkes úsh aıǵa deıin quraıtyn bolady. Osylaısha, 2026 jylǵy 1 qazan — jumyspen qamtý qyzmetiniń jumysyn jetildirý jáne laıyqty jumys izdeý merzimin 13 kúnge ulǵaıtý jónindegi pılottyq kezeńniń bastalý kúni, al jumystan aıyrylý jaǵdaıyna baılanysty áleýmettik tólemniń uzaqtyǵyna qatysty ózgeristerdiń ózi 2027 jylǵy 1 qańtardan bastap kúshine enedi», — dep atap ótti Eńbek mınıstrliginde.
Zańnamalyq ózgerister kúshine engenge deıin mınıstrlik eldiń barlyq óńirlerinde keń kólemde aqparattyq-túsindirý jumystaryn uıymdastyratyny habarlanady.
Eske salaıyq, buǵan deıin biz qazaqstandyqtar jumystan aıyrylǵan jaǵdaıda «jumyssyzdyq járdemaqysyn» rásimdeı alatynyn jazǵan bolatynbyz. Onda 1 qazannan bastap tólemderdi úsh aı boıy alýǵa bolatyny aıtylǵan edi.