Batys Qazaqstan oblysynda sot epılepsıasy bar jergilikti turǵyndy júrgizýshi kýáliginen aıyrdy. Oblystyq polısıa departamenti talap qoıǵan, sot ony qanaǵattandyrdy, dep habarlaıdy infohub.kz saıty.
Batys Qazaqstan oblysy sottarynyń resmı Telegram-arnasynyń málimetinshe, Jańǵala aýdandyq soty polısıa departamentiniń er adamǵa qatysty talap aryzy boıynsha azamattyq isti qarady. Talap kólik quraldaryn basqarý quqyǵyn toqtatý jáne júrgizýshi kýáligin tapsyrýdy mindetteý boldy.
İs barysynda jaýapkerdiń 2017 jylǵy 29 tamyzda «V» sanatyndaǵy júrgizýshi kýáligin alǵany anyqtaldy. Alaıda medısınalyq mekemeniń derekteri boıynsha, ol G40.8 — «Epılepsıanyń basqa naqtylanǵan túrleri» dıagnozymen dıspanserlik esepte tur.
Qoldanystaǵy zańnamaǵa sáıkes, júrgizýshiniń densaýlyq jaǵdaıynyń nasharlaýy kólik quraldaryn qaýipsiz basqarýǵa kedergi keltirse jáne medısınalyq qorytyndymen rastalsa, bul kólik basqarý quqyǵyn toqtatýǵa negiz bolady. Sot jaýapkerdegi aýrýdyń medısınalyq qarsy kórsetilimder tizimine kiretinin jáne avtomobıl basqarýǵa absolútti qarsy kórsetilim ekenin anyqtady.
Barlyq mán-jaılardy eskere otyryp, sot talapty qanaǵattandyrdy. Júrgizýshi kýáliginiń qoldanysy toqtatylyp, er adam ony BQO PD bólimshesine tapsyrýǵa mindetteldi. Sot sheshimi ázirge zańdy kúshine engen joq.