Fıdjıde adam ımmýn tapshylyǵy vırýsyna baılanysty ahýal kúrt ýshyqty: bir jylda jańa dıagnoz sany 27%-ǵa artqan soń, bılik AITV ınfeksıasyn ulttyq másele dep jarıalady, dep habarlaıdy infohub.kz saıty.
Reuters agenttiginiń jazýynsha, 2025 jyly AITV ınfeksıasy 2 016 adamnan anyqtalǵan. Sol jyly 59 bala AITV-men dúnıege kelgen, olardyń 18-i bir jasqa tolmaı kóz jumǵan.
Bıliktiń málimdeýinshe, testileýdi keńeıtý aýrýdy erterek satyda emdeýge múmkindik berdi. Endi Fıdjı tegin ári qupıa testileýge, sondaı-aq aldyn alý dárilerine qoljetimdilikti keńeıtýdi josparlap otyr.
Aıta keteıik, halqy shamamen 900 myń adam bolatyn Fıdjıde jańa juqpa jaǵdaılarynyń ósý qarqyny álemdegi eń joǵarylardyń biri. Keıbir baǵalaýlar boıynsha, byltyr munda 9 100 AITV-ınfeksıasyn juqtyrǵan adam turǵan, alaıda olardyń tek 39%-y óz mártebesin bilgen, al 22%-y antıretrovırýstyq terapıa qabyldaǵan.
Dúnıejúzilik densaýlyq saqtaý uıymynyń dereginshe, Fıdjıde qazir árbir 60-ynshy eresek adam AITV-men ómir súrip jatyr. Alaıda bul kórsetkish Afrıkanyń keıbir aımaqtaryna qaraǵanda tómen — onda DDU dereginshe, árbir 35-inshi eresek adamda osyndaı dıagnoz bar.
Buǵan deıin «Kýrsıv» zertteýshiler nárestelerde AITV emin arnaıy antıdeneler arqyly tıimdirek etýge bola ma, sony teksergenin jazǵan.
Eske salaıyq, búginde álemde shamamen 1,5 mln bala AITV-men ómir súredi, al jyl saıyn vırýsty shamamen 130 myń náreste juqtyrady.