2022 jyldan beri sottan jasyrynyp júrgen «The Finiko» qarjy pıramıdasyn basqarǵan áıel Túrkıadan Qazaqstanǵa ekstradısıalandy. Onyń quny 221 mln teńge turatyn jer telimi tárkilendi, dep habarlaıdy infohub.kz saıty.
Qarjy monıtorıńi agenttiginiń qyzmetkerleri anyqtaǵandaı, «The Finiko» eshqandaı kásipkerlik nemese ınvestısıalyq qyzmetpen aınalyspaǵan. Buryn tartylǵan qatysýshylarǵa tólemder jańa salymshylardyń aqshasy esebinen júrgizilgen.
«Mundaı sqema tabystylyq ıllúzıasyn týdyryp, azamattardyń qarajatyn odan ári tartýdy qamtamasyz etti», — dep naqtylady vedomstvo.
Zańsyz qyzmetiniń nátıjesinde kúdikti salymshylardan 160 mln teńgeden astam qarajat tartqan.
«Sonymen qatar, sotqa deıingi tárkileý aıasynda kúdiktiniń quny 221 mln teńge turatyn jer telimi memleket kirisine aınaldyryldy», — dep naqtylady vedomstvo.
Buǵan deıin osy qylmystyq is boıynsha úsh fıgýrant múlki tárkilenip, 6 jylǵa deıingi merzimge bas bostandyǵynan aıyrý jazasyna kesilgen.
«Kýrsıv» buǵan deıin jazǵandaı, 2021 jyldyń shilde aıynyń sońynda Finiko qarjy pıramıdasynyń taǵy bir negizin qalaýshy Kırıll Doronın Qazan qalasynda ustalǵan. Qazaqstanda kompanıaǵa qatysty qylmystyq is qozǵalǵan. 2021 jyldyń 7 shildesinde biryńǵaı tizilimde Qazaqstan Respýblıkasy Qylmystyq kodeksiniń 217-babynyń 3-bóligi — «Qarjy (ınvestısıalyq) pıramıdasyn, qylmystyq topty qurý jáne basqarý, aıryqsha iri mólsherde qarajat tartý» boıynsha sotqa deıingi tergeý tirkelip, bastalǵan.
Kompanıa azamattardyń qarajatyn salynǵan somanyń 150%-ǵa deıingi aı saıynǵy syıaqy berý shartymen tartqan. Eń tómengi salym 500 dollardy quraǵan. Finiko saıtyndaǵy derekterge sáıkes, salymshylardyń sany Qazaqstan, Reseı, Qyrǵyzstan, Armenıa, Belarýs, Ózbekstan, Túrkıa jáne basqa da elderden 165 myńnan astam adamdy quraıdy.