Qostanaı oblysynyń turǵyny kásipkerlikti damytýǵa berilgen 1,38 mln teńge kólemindegi grantty prokýratýra aqshanyń maqsatsyz jumsalǵanyn anyqtaǵan soń búdjetke qaıtardy, dep habarlaıdy infohub.kz saıty.
Vedomstvonyń resmı saıtynda habarlanǵandaı, Áýlıekól aýdanynyń prokýratýrasy 2023 jyly azamatqa kásipkerlik jobany júzege asyrýǵa 1 380 000 teńge kóleminde memlekettik grant berilgenin anyqtady.
Alaıda grant qarajatyna satyp alynǵan jabdyq is júzinde kórsetilgen maqsatta paıdalanylmaǵan. Sonymen qatar, onyń tehnıkalyq sıpattamalary eseptik qujattarda kórsetilgen málimetterge sáıkes kelmegen.
Áýlıekól aýdany prokýratýrasynyń materıaldary boıynsha alaıaqtyq belgileri boıynsha sotqa deıingi tergeý bastaldy.
Tergeý barysynda grant alýshy memleketke keltirilgen zalaldy tolyq ótep, barlyq somany búdjetke erikti túrde qaıtardy.
Kinásin moıyndaýy, zalaldy erikti túrde óteýi jáne zańda kózdelgen ózge de mán-jaılar eskerilip, qylmystyq is aqtalmaıtyn negizder boıynsha qysqartyldy.