Mańǵystaý oblysynda sapasyz gúl shoǵy tutynýshyǵa aýystyrylyp berildi, dep habarlaıdy infohub.kz.
Qazaqstan Respýblıkasy Saýda jáne ıntegrasıa mınıstrligi Tutynýshylardyń quqyqtaryn qorǵaý komıtetiniń resmı saıtynda habarlanǵandaı, Mańǵystaý oblysy boıynsha Saýda jáne tutynýshylardyń quqyqtaryn qorǵaý departamentine syılyqqa satyp alynǵan gúl shoǵynyń sapasyna qatysty tutynýshynyń ótinishi túsken.
Tutynýshy satýshydan gúl shoǵyn aldyn ala tapsyryspen, usynylǵan býkettiń fotosýretine qarap tańdaǵan. Alaıda tapsyrysty alǵannan keıin kompozısıanyń naqty túri kórsetilgen úlgiden aıtarlyqtaı erekshelengeni anyqtaldy. Atap aıtqanda, gúlder solyp qalǵan, balǵyn emes jáne kútilgen syrtqy túrge sáıkes kelmegen.
Býket syılyqqa satyp alynǵandyqtan, tutynýshy tapsyrys berý kezinde usynylǵan úlgige sáıkes keletin sapaly gúl shoǵyn alýǵa úmittengen.
Taýardy alǵannan keıin tutynýshy satýshyǵa júginip, býkettiń tapsyrys berilgen úlgige sáıkes kelmeıtinin aıtyp, týyndaǵan jaǵdaıdy retteýdi suraǵan. Alaıda onyń talaby bastapqyda qanaǵattandyrylmaǵan.
Osyǵan baılanysty tutynýshy óz quqyqtaryn qorǵaýǵa járdemdesý úshin Mańǵystaý oblysy boıynsha Saýda jáne tutynýshylardyń quqyqtaryn qorǵaý departamentine júgingen.
Vedomstvo mamandary ótinishti qarap, satýshyǵa Qazaqstan Respýblıkasynyń tutynýshylardyń quqyqtaryn qorǵaý salasyndaǵy zańnama talaptaryn saqtaý jáne satyp alýshy aldyndaǵy mindettemelerdi oryndaý qajettigi týraly túsindirme jumystaryn júrgizgen.
Júrgizilgen jumystyń nátıjesinde daý sotqa deıin rettelgen. Satýshy tutynýshynyń talabyn qanaǵattandyryp, usynylǵan úlgige sáıkes keletin, balǵyn jáne sapaly jańa gúl shoǵyn bergen.