Jyl basynan beri Qazaqstannyń ishki ister organdary dinı-ekstremıstik ıdeıalardy jamylǵan 22 qylmystyq toptyń jolyn kesti. Olardyń quramynan 64 adam ustaldy, dep habarlaıdy infohub.kz saıty.
İshki ister mınıstrliginiń aqparattyq medıaportalynyń málimetinshe, ustalǵandar qorqytyp alý, alaıaqtyq jáne tonaý, brakonerlik jáne esirtki satýmen aıyptalǵan. Qylmystyq áreketteri úshin olar atys qarýyn saqtaǵan.
«Mundaı toptar eldiń túrli óńirlerinde, onyń ishinde Almatyda, Aqtóbe, Atyraý, Jambyl, Mańǵystaý jáne Batys Qazaqstan oblystarynda áreket etti», — dedi İİM-de.
Máselen, Almatyda radıkaldy dinı ıdeıalardy ustanǵan tórt adam qala turǵynynan 7,5 mln teńge urlaǵan. Kináliler sot úkimimen 5 pen 6 jyl aralyǵynda bas bostandyǵynan aıyryldy.
Petropavlda radıkaldy dinı ıdeologıany ustanǵan áıel jasaǵan alaıaqtyqtyń tórt epızody ashyldy. Jalpy shyǵyn 2 mln teńgeden asty. Áıel 3 jylǵa bas bostandyǵynan aıyryldy.
Pavlodarda radıkaldy dinı kózqarastaǵy jergilikti turǵyn alaıaqtyqtyń 17 epızodyn jasaǵan. Shyǵyn 8 mln teńgeden asty. Sot oǵan 5 jylǵa bas bostandyǵynan aıyrý jazasyn kesti.
Barlyǵy ishki ister organdary dinı ekstremızm ıdeıalaryn ustanǵandar jasaǵan 155 qylmysty ashty. Zańsyz aınalymnan 114 birlik atys jáne 3 birlik sýyq qarý, 7 granat, 1 600-den astam oq-dári jáne 32 kg-nan astam esirtki tárkilendi.
Sonymen qatar polısıa ekstremıstik jáne terorıstik qylmystardy, onyń ishinde ınternette radıkaldy ıdeologıany taratýdy anyqtap, jolyn kesýde.
Aqtóbede qala turǵyny áleýmettik jelilerde ózge dinı ustanymdaǵy adamdardy qorlap, dinı arazdyqty ashyq tutandyrǵan. Ol 3 jyl 6 aıǵa bas bostandyǵynan aıyryldy.
Sondaı-aq Aqtóbede zorlyq-zombylyq aksıalaryn josparlaǵan radıkaldy kózqarastaǵy jas jigit ustaldy. Terorızmdi nasıhattaǵany úshin sot oǵan 6 jylǵa bas bostandyǵynan aıyrý jazasyn taǵaıyndady.
Túrkistan oblysynda «Ózbekstan ıslam qozǵalysy» halyqaralyq terorıstik uıymynyń ıdeıalaryn ınternette belsendi taratqan radıkaldy dinı ıdeologıany ustanýshy ustaldy. Ol 7 jylǵa bas bostandyǵynan aıyryldy.
«Dinı senimder qylmysqa, zorlyq-zombylyqqa jáne arazdyq tutandyrýǵa aqtaý bola almaıdy. İİM azamattardy qorǵaý, qylmystyq árekettiń jolyn kesý jáne zorlyq-zombylyq pen dinı artyqshylyq ıdeologıasynyń taralýyna jol bermeý jumysyn jalǵastyrýda. Bul jumys qoǵamdaǵy qaýipsizdikti qamtamasyz etýge jáne tártipti saqtaýǵa baǵyttalǵan», — dedi vedomstvoda.