Qazaqstan İshki ister mınıstrligi azamattardyń qandaı jaǵdaıda pyshaq alyp júre alatynyn jáne qandaı shekteýler qoldanylatynyn túsindirdi, dep habarlaıdy infohub.kz saıty.
Vedomstvonyń túsindirýinshe, pyshaq jatatyn sýyq qarýdy kámeletke tolǵan adamdar azamattyq qarýdy saqtaýǵa jáne alyp júrýge ruqsaty men ańshylyq kýáligi bolǵan jaǵdaıda ǵana satyp ala alady.
«Arnaıy ruqsat pyshaqty alyp júrýge ǵana emes, satyp alýǵa da qajet. Sonymen qatar satyp alynǵan sýyq qarý ıesiniń ańshylyq kýáligine engizilýi tıis. Oǵan qosa, pyshaqty tek mamandandyrylǵan dúkenderden satyp alý kerek», — dep túsindirdi İshki ister mınıstrligi.
Mınıstrlik qarýdyń jáne qurylymy jaǵynan qarýǵa uqsas buıymdardyń kez kelgen túrin satý týraly aqparatty turaqty túrde baqylap otyratyny atap ótildi.
«Atalǵan aqparat rastalǵan jaǵdaıda qoldanystaǵy zańnamaǵa sáıkes tıisti sharalar qoldanylady. Azamattyq qarý tek mamandandyrylǵan dúkenderdiń saýda zaldarynda satylady», — dedi vedomstvo.
Sonymen qatar «Qarýdyń jekelegen túrleriniń aınalymyn memlekettik baqylaý týraly» zańnyń 7-baby 2-tarmaǵynyń 9-tarmaqshasyna sáıkes, tıisti tirkeýsiz uzyndyǵy 90 mıllımetrden asatyn sýyq júzdi qarýdyń aınalymyna tyıym salynady.
«Pyshaqty turmystyq maqsatta alyp júrseńiz, júziniń uzyndyǵy 9 santımetrden aspaýy kerek. Qajet bolǵanda pyshaqty jolǵa, kólikke nemese basqa jerlerge alyp shyqsańyz, osy normany eskergen jón», — dep naqtylady İİM.
Mınıstrlik sondaı-aq 2026 jyldyń segiz aıynyń qorytyndysy boıynsha alty jedel-profılaktıkalyq is-shara ótkizilgenin qosty. Olar qarý qoldaný arqyly jasalatyn quqyq buzýshylyqtardyń aldyn alýǵa, sondaı-aq zańsyz saqtalǵan qarý zattaryn anyqtaýǵa baǵyttalǵan.