Jańa oqý jylynyń jaqyndaýyna baılanysty İshki ister mınıstrligi barlyq ata-analar men ustazdarǵa úndeý jasady, dep habarlaıdy infohub.kz saıty.
Vedomstvonyń aıtýynsha, oqý jyly bastalǵanda balalar úıden tys ýaqyttaryn kóbeıtedi, mektepke ózdiginen barady, úıirmeler men seksıalarǵa qatysady. Osyǵan baılanysty İİM joldaǵy qarapaıym qaýipsizdik erejelerin qaıtalaýdyń mańyzdylyǵyn atap ótti.
1 qyrkúıek qarsańynda barlyq mektepterde jol qozǵalysy qaýipsizdigin qamtamasyz etý turǵysynan tekserý júrgizildi. Sondaı-aq balalardy tasymaldaýǵa arnalǵan barlyq avtobýstar tekserildi. Anyqtalǵan kemshilikter boıynsha nusqamalar berilip, olardy joıý oqý jyly bastalǵanǵa deıin qamtamasyz etiledi.
İİM joldyń júrý bóligin tek ruqsat etilgen jerlerden kesip ótý kerektigin eske salady. «Telefon men qulaqqapty qoıyńyz, muqıat bolyńyz. Velosıped, moped jáne elektrosamokat paıdalanǵanda jol qozǵalysy erejelerin mindetti túrde saqtańyz», — dep eskertti vedomstvo.
Tártip saqshylary ata-analarǵa jeke úndeý jasady: «Balańyzdyń qaıda júrgenin, kimmen aralasatynyn jáne nemen qyzyǵatynyn bilińiz. Balalaryńyzben jıi sóılesińiz. Eń bastysy, qıyn jaǵdaıda bala sizden kómek suraýdan qoryqpaýy kerek. Eger balaǵa qaýip tónse, "102" nómirine qońyraý shalyńyz nemese "111" kontakt-ortalyǵyna habarlasyńyz. İshki ister mınıstrligi ár balanyń jańa oqý jyly qaýipsiz ótýi úshin qajetti sharalardy qabyldaýda. Bizdiń ortaq mindetimiz — qaýiptiń aldyn alý ǵana emes, balalarǵa ony tanýǵa jáne ýaqytynda kómek suraýǵa úıretý. Balalaryńyzdy qorǵańyzdar», — dedi polısıa qyzmetkerleri.