Kapshaǵaı sý qoımasynda gıdrosıkl demalýshylar otyrǵan úrmeli dıvanǵa soǵyldy. Saldarynan 36 jastaǵy áıel men 14 jastaǵy qyz birneshe synyq alyp, bir aıdan astam ýaqyt ózdiginen júre almaı júr, dep habarlaıdy infohub.kz.
Oqıǵa shilde aıynyń sońynda bolǵan. Eki otbasy qaıyqqa arqanmen baılanǵan úrmeli dıvanda serýendeýdi uıǵarǵan. Zardap shekken Nazıra Ospanbektiń aıtýynsha, bir kezde qaıyq sýdyń ortasynda toqtap, demalýshylar júrgizýshiden olardy jaǵaǵa aparýdy ótingen.
«Qaıyqshy qaıyq pen dıvandy toqtatty. Sóıtip, biz sý ústinde turdyq. Qaıyqshyǵa: "Bizdi jaǵaǵa apar" dep aıǵaılaı bastadyq, biraq ol bizdi estimedi. Kúıeýim ysqyryp: "Boldy, jetkilikti. Bizdi jaǵaǵa apar" dedi. Sol kezde qaıyqshy dıvandy solǵa buratyndaı traektorıamen qozǵala bastady. Dál sol sátte bizge gıdrosıkl soǵyldy», — dedi Nazıra Ospanbek.
Soqqy saldarynan áıeldiń qabyrǵalary men qoly birneshe jerden synyp, jambasy soǵylyp, ishki aǵzalary zaqymdanyp, mıy shaıqalǵan. Ol úsh operasıa jasatqan, biraq áli kúnge deıin ózdiginen júre de, otyra da almaıdy.
«Fızıkalyq aýyrsyný da qatty mazalaıdy, sebebi jatqan kúıde qarapaıym qajettilikterińdi óteı almaısyń. Bul óte qıyn. Eń aýyry — buǵan qatysy barlardyń eshqaısysy jaýapkershilikke tartylmaıdy. Olar seniń fızıkalyq aýyrsynýyńdy bólise almaıdy», — dep bólisti zardap shekken áıel.
Onymen birge 14 jastaǵy Asyljan Ryskýlova da aýyr jaraqat alǵan. Qyzdyń aıaǵy men jambasy synyp, mıy shaıqalǵan. Oqıǵadan keıin jasóspirim komaǵa túsip, tek altynshy kúni esin jıǵan.
Asyljan operasıa jasatyp, qazir de júre de, otyra da almaıdy. Toǵyzynshy synyp oqýshysy qashyqtan oqýyn jalǵastyrýda.
«Aıaǵyna operasıa jasady, gıps qoıdy. Bir súıegi úsh jerden synǵan, sondyqtan plasına saldy. Únemi aýyrsyný basatyn dári ishemiz. Emosıonaldyq jaǵdaıymyz nashar. Munyń bárin kórý qıyn. Ana retinde aýyr», — dedi qyzdyń anasy Janar Ryskýlova.
Zardap shekkender polısıaǵa júgingen. Almaty oblysy PD habarlaǵandaı, oqıǵa boıynsha qylmystyq is qozǵalǵan.
«Teńiz nemese ózen kóliginiń qozǵalys qaýipsizdigi nemese paıdalaný erejelerin buzý faktisi boıynsha qylmystyq is qozǵaldy», — dep habarlady Almaty oblysy PD baspasóz qyzmeti.
Gıdrosıkl júrgizýshisi is boıynsha kúdikti retinde ótip, qazir erkindikte. Zardap shekkender sondaı-aq sý kóligin jalǵa bergen gıdrosıkl ıesi men qaıyqty basqarǵan er adamdy jaýapkershilikke tartýdy talap etýde.