Qaraǵandyda on jeti kúzetshi eki aılyq jalaqysy tólenbegeni úshin jumys berýshige sotqa shaǵymdandy. Nátıjesinde olar isti utyp, aqshalaryn alady, dep habarlaıdy infohub.kz saıty.
Joǵarǵy sottyń resmı Telegram-arnasynda habarlanǵandaı, Qaraǵandydaǵy Bókeıhan aýdanynyń sotyna JSHS-tiń 17 kúzetshisi 2025 jylǵy aqpan jáne naýryz aılaryndaǵy jalaqy qaryzyn óndirip alý týraly talappen júgingen.
Jaýapker qaryz tapsyrys berýshiniń kelisimshartty birjaqty buzýyna baılanysty paıda bolǵanyn, kórsetilgen qyzmetterge aqy tólenbegenin túsindirdi.
Eńbek kodeksiniń 23-baby 2-tarmaǵynyń 5-tarmaqshasyna sáıkes jumys berýshi úshinshi tulǵalardyń mindettemelerdi oryndaýyna qaramastan, qyzmetkerlerge jalaqyny ýaqytyly jáne tolyq kólemde tóleýge mindetti.
Sot otyrysy barysynda talapkerlerdiń eńbek mindetterin tolyq oryndaǵany anyqtaldy. Bul usynylǵan dáleldemelermen, onyń ishinde kúzetiletin nysandardaǵy kezekshilik kesteleri men taýarlyq-materıaldyq qundylyqtardy tirkeý jýrnaldarymen rastaldy.
Sonymen qatar, Qaraǵandy oblysynyń Mamandandyrylǵan aýdanaralyq ekonomıkalyq sotynyń zańdy kúshine engen sheshimimen JSHS-tiń kelisimshartty buzǵan kontragentke qatysty talaby qanaǵattandyryldy. Kontragentten 10,8 mln teńge kólemindegi qaryz óndirildi.
İsti qaraý nátıjesi boıynsha sot málimdelgen talaptardyń negizdiligi týraly qorytyndyǵa kelip, talapty tolyq qanaǵattandyrdy. JSHS-ten barlyq 17 qyzmetkerdiń paıdasyna eki aılyq jalaqy boıynsha 3 mln teńgeden astam qaryz óndirildi.
Sot sheshimi zańdy kúshine endi.