Qaraǵandyda qos kisi óltirý oqıǵasy boldy: baq qooperatıviniń tóraǵasy men jergilikti turǵyn qaza tapty. Qylmys jasady degen kúdikpen 56 jastaǵy er adam ustaldy, dep habarlaıdy infohub.kz saıty.
Qaıǵyly oqıǵa 6 qyrkúıek kúni keshki saǵat 19:00 shamasynda «Optımıs» baq qoǵamynan shyǵa beriste boldy. Sol jerden 43 jastaǵy er adam men 55 jastaǵy áıeldiń deneleri oq jaraqatymen tabyldy. Qaza tapqan — bıylǵy maýsymnyń basynda tóraǵalyqqa saılanǵan Ivan Korovın. Áıel shabýyl kezinde baqtan úıine qaıtyp kele jatqan.
KTK telearnasynyń málimetinshe, ustalǵan adam buryn osy baq qoǵamyn basqarǵan. Ol aldymen óz izbasaryna oq atqan, sodan keıin kýáger bolýy múmkin áıeldi óltirgen degen boljam bar. Qylmystan keıin kúdikti qashyp ketpek bolǵan, alaıda polısıa beınebaqylaý kameralarynyń kómegimen onyń izine túsken.
«Ol kinásin moıyndady. Kúdikti ýaqytsha ustaý ızolátoryna qamaldy», — dedi Qaraǵandy oblysy polısıa departamentiniń resmı ókili Baqytjan Qudıarov.
Qos kisi óltirý faktisi boıynsha qylmystyq is qozǵaldy. Tergeý amaldary jalǵasýda, qylmystyń resmı sebebi ázirge jarıalanbaıdy.
Baq ıeleriniń qaıtys bolǵan tóraǵa týraly pikirleri ekige jaryldy. Keıbiri Korovındi jaýapty basshy dep sıpattaıdy, onyń kezinde qubyrlar jóndelip, aýmaq abattandyrylǵan.
«Tártip ornatty. Bizde qubyr jarylyp jıi boldy, qubyrlardy aýystyrdy. Jaqsy adam edi, eshteńe aıta almaımyn», — dedi baq ıesi Vladımır Edýkov.
Basqa turǵyndar basshylyq aýysqannan keıin qoǵamda sý jáne basqa da komýnıkasıalarǵa qatysty problemalar týyndaǵanyn aıtady. Keıbiri ustalǵan adamnyń kináli ekenine kúmán keltiredi.
Burynǵy jáne jańa tóraǵalar arasyndaǵy janjal shamamen úsh jylǵa sozylǵan. Er adamdar birneshe ret daýlasyp, sottasyp, basty kelispeýshilik — baq qoǵamy tóraǵasy laýazymy bolǵan. Degenmen tergeý bul janjaldyń óltirýge sebep bolǵanyn resmı rastamaǵan.