Qaraǵandyda sot jaýapkerdi áıeldiń kelisiminsiz fotosýretin paıdalanǵany úshin ótemaqy tóleýge mindettedi. Oqıǵa Instagram-da boldy, onda sýret qorlaıtyn jazýmen jarıalanǵan. Sot talapty ishinara qanaǵattandyryp, moraldyq zıan retinde 100 myń teńge óndirdi, dep habarlaıdy infohub.kz saıty.
Qaraǵandy oblysy sottarynyń resmı Telegram-arnasynda habarlanǵandaı, Qaraǵandy qalasy Qazybek bı aýdanynyń №2 soty beınege quqyqty qorǵaý, áleýmettik jelidegi jarıalanymdy joıý, fotosýretti odan ári paıdalanýǵa tyıym salý jáne moraldyq zıannyń ótemaqysyn óndirý týraly talap boıynsha azamattyq isti qarady.
Sot anyqtaǵandaı, 2026 jylǵy 20 aqpanda talapker Instagram-da jaýapkerdiń paraqshasynan óziniń beınesi bar, «áıeldiń tegi 500 000 teńge» degen jazýmen jarıalanǵan jazbany tapqan. Fotosýret áıeldiń kelisiminsiz ornalastyrylǵandyqtan, ol jaýapkerge jarıalanymdy joıýdy jáne 250 myń teńge kóleminde moraldyq zıandy óteýdi talap etip, sotqa deıingi shaǵym joldaǵan.
Keıin talapker sotqa talap aryzben júgingen. Jaýapker talapty moıyndamaı, shaǵymdy alǵannan keıin jarıalanym 2026 jylǵy 30 naýryzda joıylǵanyn kórsetken. Daýdy sheshý kezinde sot Qazaqstan Respýblıkasy Azamattyq kodeksiniń azamattyń óz beınesine quqyǵyn bekitetin 145-babyn basshylyqqa alǵan.
Sot azamattyń kelisiminsiz onyń beınesin paıdalanýǵa tek zańda kózdelgen jaǵdaılarda, mysaly, adam qoǵamdyq is-sharalarǵa qatysqanda nemese onyń beınesi qyzmettik ne qoǵamdyq qyzmetti júzege asyrýǵa baılanysty bolǵanda jol beriletinin atap ótken. Alaıda bul jaǵdaıda daýly fotosýret jaýapkerdiń jarıa paraqshasynda talapkerdiń kelisiminsiz ornalastyrylyp, uzaq ýaqyt boıy ashyq qoljetimdilikte bolǵan. Sot zańda kózdelgen negizderdiń bar ekendigine dálelder anyqtaǵan joq.
Óz beınesine quqyq azamattyń jeke múliktik emes quqyqtaryna jatady. Ony buzý zańda kózdelgen qorǵaý tásilderin, onyń ishinde moraldyq zıannyń ótemaqysyn tóleýdi talap etedi. Sot sheshimimen talap ishinara qanaǵattandyryldy: sot jaýapkerge talapkerdiń beınesin onyń kelisiminsiz paıdalanýǵa tyıym salyp, jaýapkerden talapkerdiń paıdasyna 100 myń teńge kóleminde moraldyq zıannyń ótemaqysyn, sondaı-aq sot shyǵyndaryn óndirdi.
Qaraǵandy oblystyq sotynyń azamattyq ister jónindegi sot alqasy birinshi satydaǵy sottyń tujyrymdarymen kelisip, sheshimdi ózgerissiz qaldyrdy, al apelásıalyq shaǵymdy qanaǵattandyrýsyz qaldyrdy.