Qaraǵandyda janjal órship tur: birqatar mamandyqtar boıynsha júzge jýyq talapker ýáde etilgen memlekettik granttardy ala almady. Ata-analar narazy, jaǵdaıǵa kolej jáne bilim basqarmasy túsinikteme berýde, dep habarlaıdy infohub.kz saıty.
Oksana Matveeva telearnaǵa qyzy 9-synypty bitirgen soń baǵalaýshy-tehnık mamandyǵyna oqýǵa túsýge bel býǵanyn aıtty. Qaraǵandydaǵy kolejde emtıhansyz qabyldaý jáne shákirtaqy taǵaıyndalatynyn ýáde etken. Áıeldiń sózinshe, grantqa qujattardy maýsymda tapsyrǵan, al barlyǵyn 25 tamyzda jınamaq bolǵan. Biraq ol kúni de, keıin de eshqandaı aqparat bolmaǵan. Granttyń bolmaıtynyn Oksana tek 4 qyrkúıekte bilgen. Eger aldyn ala eskertkende, qyzy basqa mamandyqqa grantqa úlgerer edi, dep narazylyq bildirdi ana.
«25 maýsymda barlyq quryltaıshylardy basqarmaǵa jınap, ondaı mamandyqtarǵa grant bolmaıtynyn aıtqan eken. Iaǵnı, bizdiń mamandyqtar grantqa ilikpedi, esep pen aýdıtke de grant bolmady. Olar basynan bilgen, biraq bizge nege eshkim habarlamady», — dedi kolej talapkeriniń anasy Oksana Matveeva.
Býkenov atyndaǵy Joǵary kolejde mamandyqtar memlekettik tapsyrys bólinetin tizimge engenin, alaıda tamyzda keıbir mamandyqtarǵa grant tek bir oqý tiline ǵana bólingeni anyqtalǵanyn habarlady. Grantsyz 100 adam qaldy, taǵy 69-y kúmánde.
«Qabyldaý komısıasynda biz sońyna deıin osy talapkerlerdi qamtı alamyz ba dep úmittendik, olar konkýrsqa qatysar edi. Biraq baza jabyq bolǵandyqtan, eshkimdi engize almaımyz. Qazir ata-analardan keshirim suraımyz, bizdiń de qateligimiz bar ekenin túsinemiz», — dedi Býkenov atyndaǵy Qaraǵandy joǵary kolejiniń dırektory Nadıa Spanova.
Grantsyz qalǵan talapkerlerdiń arasynda úzdikter de, jetimder de, qamqorlyqtaǵylar da bar. Barlyǵyna kolejde 50 paıyzdyq jeńildikpen aqyly oqý usynylýda. Bilim basqarmasy bıyl granttardyń burynǵydan da kóp bólingenin, biraq jumysshy mamandyqtaryna bólingenin jetkizdi. Aqparat OQU platformasynda ornalastyrylǵan. Árkim qujattaryn onlaın tapsyra alatyn.
«Bıyl eń kóp suranysqa ıe mamandyqtardy qamtý mindeti qoıyldy. Bul — ónerkásiptegi jumysshy mamandyqtary, oblys boıynsha búgingi kúni bizge qajetti barlyq baǵyttar», — dedi Qaraǵandy oblysy bilim basqarmasynyń tehnıkalyq jáne kásiptik bilim bóliminiń basshysy Gúldana Nursultan.
Telearna 2025 jyldan bastap Qazaqstanda elde suranysqa ıe jumysshy jáne tehnıkalyq mamandyqtar boıynsha memlekettik tapsyrys kólemi ulǵaıtylǵanyn qosady. Oqý memlekettik granttar negizinde júzege asyrylady, olar qujattar konkýrsy boıynsha bólinedi, mindetti túrde 9 synyp atestatynyń ortasha baly eskeriledi.