Qaraǵandy oblysynda ótken táýlikte aldyn ala esep boıynsha 90 gektar aýmaqta bes tabıǵı órt sóndirildi. Shet, Buqar jyraý jáne Qarqaraly aýdandarynda segiz oshaqtaǵy órtti sóndirý jalǵasýda. Bul týraly Tótenshe jaǵdaılar mınıstrligi habarlady, dep jazady infohub.kz saıty.
Órtter taýly-dalaly jerde qurǵaq shóp pen butalardyń tutanýynan shyqqan.
Órtti sóndirýge TJM men jergilikti atqarýshy organdardan 500-den astam adam jáne 145 tehnıka birligi jumyldyryldy.
Qarqaraly aýdanynyń Besoba aýylynda órtti sóndirýge TJM-niń sý tógetin qurylǵysy bar «Qazavıaspas» tikushaǵy tartyldy. Áýeden jalpy kólemi 12 tonna sý tórt ret tastaldy.
Sóndirý jumysyn jetý qıyn taýly-dalaly beder, ystyq ári qurǵaq aýa raıy, sondaı-aq qatty ekpindi jel qıyndatyp otyr.
Qaraǵandy oblysynyń Tótenshe jaǵdaılar departamentinde jumyldyrylǵan kúshter men quraldardyń jumysyn úılestiretin jedel shtab quryldy.
Qazirgi tańda eldi mekenderge qaýip joq. Sóndirý jumystary táýlik boıy jalǵasýda.
Buǵan deıin «Kýrsıv» 7 qyrkúıekte Qazaqstanda tórt orman órti tirkelgenin jazǵan bolatyn — ekeýi Qostanaı oblysynda, bireýi Shyǵys Qazaqstan oblysynda jáne «Kókshetaý» MUTP aýmaǵynda. Barlyq órt oshaǵyn oqshaýlap sóndirý múmkin boldy, ottyń úlken aýmaqqa taralýyna jol berilmedi.