Qazaqstandyq poıyzdarda kýpedegi oryndardy satý prınsıpi ózgerýi múmkin, bul beıtanys erler men áıelderdiń birge ornalasýyna jol bermeýi kerek. QTJ mamandar bul júıeni qazirdiń ózinde zerttep jatqanyn habarlady, dep habarlaıdy infohub.kz saıty.
Talqylaýǵa sebep bolǵan — qazaqstandyq áıeldiń Threads áleýmettik jelisindegi jazbasy. Ol Túrkıadaǵy temirjol bıletterin satý erejelerine nazar aýdarǵan. Onyń aıtýynsha, eger kýpedegi birinshi oryndy er adam satyp alsa, qalǵan oryndar tek erlerge usynylady. Alǵashqy bıletti áıel satyp alsa, dál osyndaı prınsıp qoldanylady.
«Nege sizder bizde, Qazaqstanda, muny áli jasaı almaısyzdar? Ótinemin», — dep ol QTJ-ǵa júgingen.
Kompanıada mundaı mehanızm mamandardyń nazaryna ilikkenin aıtty. «Bul júıeni bizdiń mamandar qazirdiń ózinde zerttep jatyr. Ári qaraı júıeni engizý máselesi qarastyrylatyn bolady», — dep málimdedi QTJ-da.
Sheshimniń qashan qabyldanatyny jáne bul opsıanyń qandaı poıyzdarda paıda bolatyny ázirge belgisiz.
Sonymen qatar, Qazaqstanda tolyq bólek saıahattaý nusqalary bar. Negizgi baǵyttarda áıel jolaýshylarǵa «áıelder vagony» qyzmeti qoljetimdi. Buǵan deıin 2 qyrkúıekte Qazaqstanda taǵy bir áıelder vagony iske qosylǵany habarlanǵan bolatyn.