Jambyl oblysynda sot áskerde qyzmet etip júrgen kezde turǵylyqty jeri boıynsha tirkelmegeni úshin jas jigitke salynǵan 15 myń teńge aıyppuldy joıdy, dep habarlaıdy infohub.kz saıty.
Jambyl oblysy sottarynyń resmı Telegram-arnasynda habarlanǵandaı, Talas aýdandyq soty azamattyń turǵylyqty jeri boıynsha tirkeý erejelerin buzǵany úshin ákimshilik jaýapkershilikke tartý týraly qaýlyǵa shaǵymyn qarady.
2026 jylǵy maýsymda Qarataý qalasyndaǵy Halyqqa qyzmet kórsetý ortalyǵynda tekserý kezinde jigittiń turǵylyqty jeri boıynsha tirkelmegeni anyqtaldy. Oǵan qatysty Ákimshilik quqyqbuzýshylyq kodeksiniń 492-babynyń 2-bóligi boıynsha hattama toltyrylyp, 15 myń teńge aıyppul salyndy.
Bul sheshimmen kelispegen jigit sotqa júgindi. Ol 2025 jylǵy maýsymnan bastap Ulttyq ulanda áskerı qyzmet ótkergenin, al 2026 jylǵy maýsymda qyzmet merziminiń aıaqtalýyna baılanysty zapasqa shyǵarylǵanyn túsindirdi.
Jigit áskerı qyzmet ótkerý kezinde ákesi ony turǵylyqty jeri boıynsha esepten shyǵarǵanyn, bul týraly ol áskerı qyzmet aıaqtalǵannan keıin ǵana bilgenin aıtty.
Azamattyń áskerı qyzmet ótkergeni sotta qujattarmen rastaldy.
Sot laýazymdy tulǵanyń adamdy jaýapkershilikke tartý máselesin durys sheshý úshin mańyzy bar barlyq mán-jaılardy tıisti túrde zerttemegenin atap ótti. Jiberilgen prosestik buzýshylyqtar isti jan-jaqty, tolyq jáne obektıvti qaraýǵa kedergi keltirdi.
Osyǵan baılanysty sot shaǵymdy qanaǵattandyryp, aıyppuldy joıyp, is boıynsha is júrgizýdi toqtatty.
Qaýly zańdy kúshine endi.