Qostanaılyq kópbalaly ana jergilikti bıliktiń zańda belgilengen normadan kishirek páter berýine qarsy shyǵyp, sotta ádildikke qol jetkizdi. Mamandandyrylǵan aýdanaralyq ákimshilik sot áıeldiń qala ákimi men qalalyq turǵyn úı qatynastary bólimine qatysty talabyn qanaǵattandyrdy, dep habarlaıdy infohub.kz saıty.
Qostanaı oblysy sottarynyń resmı Telegram-arnasynda habarlanǵandaı, talapker kópbalaly otbasyǵa 77,7 sharshy metr páter berý áreketin zańsyz dep tanýdy talap etken. Sot jaýapkerlerdi jeti adamnan turatyn otbasyǵa «Turǵyn úı qatynastary týraly» Zańnyń 75-baby 1-tarmaǵynyń talaptaryna sáıkes turǵyn úı bólýge mindettedi.
Sotta atalǵan norma memlekettik turǵyn úı qorynan bir adamǵa keminde 15 jáne kóp degende 18 sharshy metr paıdaly alań, biraq bir bólmeli páterden nemese jataqhanadaǵy bólmeden kem emes mólsherde turǵyn úı berýdi kózdeıtini túsindirildi. Bul norma mindetti sıpatqa ıe jáne azamattyń naqty páterge kelisimi týraly ótinishiniń bolýyna nemese bolmaýyna qaramastan ákimshilik organ ony saqtaýǵa tıis.
Otbasy quramy jeti adam bolǵanda turǵyn úıdiń eń az aýdany 105 sharshy metrdi, eń kóbi 126 sharshy metrdi quraıdy. Demek, berilgen 77,7 sharshy metr páter zańda belgilengen mınımýmnan 27,3 sharshy metrge az.
Sot sonymen qatar máseleni qaraý kezinde talapkerdiń júktilik merzimi 22 aptadan asqanyn eskerdi, óıtkeni bala 11 kúnnen keıin dúnıege kelgen. Zańnyń 75-baby 5-bóliginiń erejeleri turǵyn úıdiń mólsherin anyqtaý kezinde áıeldiń 22 aptadan astam júktiliginiń bolýyn eskerýdi talap etedi.
Sonymen qatar, sot talapkerdiń jaldaý shartyna qol qoıý kezinde onyń jańa týǵan (merziminen buryn) balasymen perzenthanadan shyqqanyn, osal jaǵdaıda bolǵanyn jáne turǵyn úıge óte muqtaj bolǵandyqtan osy shartqa qol qoıǵanyn dáleldegenin eskerdi.
Sot azamatty zańda belgilengen jeńildik sanatyna jatqyzǵannan jáne memleket turǵyn úı berý týraly sheshim qabyldaǵannan keıin mindetti aýdan normasyn ákimshilik qalaýymen, qor tapshylyǵymen, derekqordyń tehnıkalyq jaǵdaıymen nemese muqtaj azamattyń usynylǵan jalǵyz nusqaǵa kelisimimen azaıtýǵa bolmaıdy degen qorytyndyǵa keldi.
Sot sheshimi zańdy kúshine engen joq.