Qostanaı oblysynda jolaýshylar poıyzynda usaq buzaqylyq jasaǵan er adam ákimshilik jaýapkershilikke tartyldy. Ol 86 500 teńge kóleminde aıyppul tóleýi tıis, dep habarlaıdy infohub.kz saıty.
Qostanaı oblysy sottarynyń resmı Telegram-arnasynda habarlanǵandaı, Beıimbet Maılın aýdanynyń sotynda er adamǵa qatysty usaq buzaqylyq (ÁQBtK-niń 434-babynyń 1-bóligi) týraly is qaraldy.
Sot tergeýi barysynda 2026 jylǵy 6 qyrkúıekte saǵat 21:00 shamasynda Beıimbet Maılın aýdany aýmaǵymen júrip ótken jolaýshylar poıyzynda masań kúıdegi jolaýshy balaǵat sózder aıtqany anyqtaldy. Ol qoǵamdyq orynda osyndaı áreketterimen qoǵamdyq tártip pen azamattardyń tynyshtyǵyn buzyp, aınalasyndaǵylarǵa ashyq qurmetsizdik kórsetken.
Sot otyrysynda er adam kinásin moıyndady. Ákimshilik jaza taǵaıyndaý kezinde sot jaýapkershilikti jeńildetetin mán-jaılardy — kináni moıyndaýdy jáne kámeletke tolmaǵan balalarynyń bolýyn eskerdi. Jaýapkershilikti aýyrlatatyn mán-jaı retinde sot ákimshilik quqyq buzýshylyqtyń masań kúıde jasalǵanyn eskerdi.
Sot qaýlysymen er adam ákimshilik quqyq buzýshylyq jasaǵany úshin kináli dep tanylyp, oǵan 86 500 teńge kóleminde aıyppul túrindegi jaza taǵaıyndaldy. Sot qaýlysy zańdy kúshine engen joq.