Qostanaıda balalardyń sýretteri jarıalanatyn Telegram-kanalǵa qatysty janjal órship tur: oqýshylardyń ata-analary polısıaǵa júginip, qorlyq pen posttardy óshirý úshin aqsha talap etilgenin málimdedi, dep habarlaıdy infohub.kz saıty.
«31 arna» habarlaǵandaı, oqýshy qyzdyń anasy Dana Penkovskıh qyzynyń sýretin «Pozor Kostanaı» Telegram-pablıginen kórip, shoshyp ketken. Jarıalanym týraly áıelge qyzdyń ózi aıtqan.
Dananyń aıtýynsha, bul qaladaǵy alǵashqy oqıǵa emes. Qorlyqqa tap bolǵan balalardyń ata-analary polısıaǵa júginýge bel býdy.
«Bizdiń qalada bul birinshi jaǵdaı emes, buǵan deıin de osyndaı toptar bolǵan, olar buǵattalady, biraq chat ákimshilerin izdemeıdi. Olardy taýyp, jazalaǵanyn qalaımyz, bul ázil emes, balalardyń jaǵdaıy nashar! Vıdeo jarıalanǵannan keıin búkil Qazaqstan boıynsha áıelderden júzdegen habarlama kelip jatyr», — deıdi oqýshy qyzdyń anasy Dana Penkovskıh.
Onyń aıtýynsha, pablık ákimshileri bul jarıalanymdardy óshirý úshin 10 myń teńge suraǵan — olar eresekterdi osy chatqa qosý úshin de sonsha aqsha talap etken.
Polısıa bul derek boıynsha tekserý júrgizilip jatqanyn habarlady.
«Qyzmetkerler bolǵan oqıǵanyń barlyq mán-jaıyn anyqtap, qajetti materıaldardy jınap, tirkep jatyr, sondaı-aq atalǵan materıaldardy ornalastyrýǵa qatysy bar adamdardy anyqtaýda. Osydan keıin olardyń áreketterine quqyqtyq baǵa beriledi», — dep atap ótti Qostanaı qalasy polısıa basqarmasynyń qoǵamdyq qaýipsizdik bóliminiń bastyǵy Qaırat Dáýrenbekov.
Sarapshylar mundaı pablık ákimshilerin tabý qıyn, biraq nıet bolsa, múmkin ekenin aıtady. Bálkim, qylmyskerler el aýmaǵynda tipti joq shyǵar, shetelden áreket etip jatqan bolýy múmkin.
«Ashyq kod bar, onda árkim birdeńe jasaı alady, bottar oılap tabady jáne t.b. Jalpy bul keremet, biraq túsiný kerek: keremet jerde — qaýipsiz emes. Balalarmen saýatty áńgime júrgizilmeıinshe, budan qutylmaımyz», — deıdi CYBERBALA jobasynyń avtory Abylaı Isın.
Alaıda ata-analar birneshe uıymdastyrýshyny taýyp, kópshilik aldynda jazalasa, mundaı toptar azaıady dep esepteıdi. Sonymen qatar, kartaǵa aqsha jiberý arqyly olar sıfrlyq iz qaldyrady, sol arqyly bolmasa da deldaldarǵa jetýge bolady.