Qazaqstan Respýblıkasy İshki ister mınıstrligi azamattarǵa alaıaqtyqtyń jańa tásili týraly eskertý jasady. Bul joly alaıaqtar ózderin baqsy-balger, kóripkel retinde tanystyryp, adamdardy aldap júr, dep habarlaıdy infohub.kz saıty.
Vedomstvonyń málimetinshe, ınternette «emshi», «kóripkel» nemese «baqsy» dep tanylatyn alaıaqtar adamdarǵa «balańyzǵa qatty kóz tıdi» dep, aqshaǵa «emdep, kóz tıýin alyp tastaýdy» usynatyn jaǵdaılar jıilegen.
İİM túsindirgendeı, alaıaqtar adamdardyń jaqyndary úshin qorqynyshy men ýaıymyn paıdalanady. Olar áleýmettik jeliler men messendjerler arqyly qurbandarymen baılanysyp, túrli «belgilerdi» sıpattap, jaǵdaıdyń aýyrlyǵyna sendiredi. Sodan keıin «emdeý júrgizý», «kóz tıýin alý» nemese «qajetti zattardy satyp alý» syltaýymen aqsha aýdarýdy suraıdy.
Polısıa qazaqstandyqtarǵa ınternettegi beıtanys adamdardyń «emdeımin», «kóz tıýin alamyn» nemese «suqtan aryltamyn» degen ýádelerine senbeýge, belgisiz adamdardyń shottaryna aqsha aýdarmaýǵa, jeke derekterin, bank kartalarynyń derektemelerin jáne SMS-habarlamalardaǵy kodtardy eshkimge aıtpaýǵa, qorqynysh pen úreıge berilmeýge, aqparatty birneshe derekkózden tekserýge, sondaı-aq hat-habarlar men aýdarym túbirtekterin saqtaýǵa keńes beredi.
İİM alaıaqtar adamdardyń senimin, olardyń jaqyndary úshin qorqynyshy men ýaıymyn paıdalanatynyn atap ótti. «Kóz tıý», «suq», «sıqyr» jáne osyǵan uqsas taqyryptardy syltaý etip aqsha talap etý — aldaýdyń bir tásili bolýy múmkin.