InfoHub Logo

Kúızelis, qobaljý, emosıonaldy toqyraý – ataýy ártúrli bolǵanymen, máni bir. Tyǵyryqqa tirelip, shyǵar jol taba almaı qalǵan jaǵdaı bárimizdiń basymyzdan ótti. Búgin ómirińizdi túbegeıli ózgertip jibermese de, ony jaıly etýge kómektesetin birneshe keńesterdiń tizimimen bólisemiz.

Mundaı jaǵdaı sizge tanys shyǵar: tańǵy saǵat 10, úshinshi shyny-aıaq kofeńizdi iship otyrsyz, basyńyzdaǵy oıdyń báriniń astań-kesteńi shyqqan. Ábden qajyp kettińiz – deneńiz de, sanańyz da, sezimińiz de ábden sharshaǵan. Buryn qýanyshqa bólegen nárselerge qazir beı-jaı qaraısyz. Motvasıa ma? Joq. Ashýshańdyq pa? Iá. Densaýlyq pen jaqsy kóńil-kúı týraly oılar she? Ataı kórmeńiz.

Ádette kópshilik bıik shyńdardy baǵyndyrý men ál-dármeni qalmaı álsireý qatar júredi dep esepteıdi. Múldem olaı emes. Emosıonaldy toqyraý tabystyń belgisi emes, bul aǵzańyzdyń demalý kerek dep dabyl soǵýy.

Eger siz buryn istegen isterińizdi istep júrseńiz, buryn alyp júrgen nárselerińizdi alasyz.

Genrı Ford

Genrı Fordtyń áıgili qanatty sózi dál osy jaǵdaıǵa arnap aıtylǵandaı.

Eki shyny-aıaq ekspresso bolsyn nemese kózińizdiń astyna jaǵylǵan konsıler bolsyn, ózimizdi arnaǵa túsirýdiń ádettegi amaldaryna kóp ýaqyt ketpeıdi. Biraq olardyń qanshalyqty paıdasy bar? Árıne, ómirdi túbegeıli ózgertý úshin budan da kóbirek ýaqyt kerek. Biraq túptiń túbinde ol talpynysyńyz bekerge ketpesi anyq. Bul sizdiń densaýlyǵyńyzǵa jáne jaqsy kóńil-kúıińizge salynǵan salym. Sondyqtan olarǵa salmaqty qaraǵanyńyz durys.

1. Uıqyńyzdy qandyryńyz

Bizdiń denemiz – mehanızm. Bul qamqorlyq pen demalysty qajet etetin óte kúrdeli keremet júıe. Jumystan ketken kezde, siz kún saıyn kompúterińizdi óshirip ketesiz. Sizdiń deneńiz ben sanańyzǵa da osyndaı nárse kerek. Zertteýler kórsetkendeı, jaqsy uıqy mıdy kúni boıy jınalǵan ýytty zattardan aryltýǵa kómektesedi. Mine, sol úshin de jeti-segiz saǵattyq tolyqqandy tynyǵý bizdiń psıhıkalyq saýlyǵymyz ben densaýlyǵymyz úshin asa mańyzdy. Sizdiń maqsatyńyz – uıqynyń kúndelikti uzaqtyǵyn birtindep osy deńgeıge jetkizý. Kún saıyn jarty saǵat artyq tynyǵý sonshalyqty qıyn emes qoı. Solaı ma?

2. Neni jáne qalaı jeıtinińiz týraly oılanyńyz

Tamaqtanýyńyzǵa baıypty qaraý úshin tájirıbe kerek. Bul ásirese júgirip júrip tamaqtanyp, arasynda hattarǵa jaýap jazyp, telefon qońyraýlaryna jaýap berip úırenip qalǵan adamdarǵa qatysty. Baıypty tamaqtaný tájirıbesi ózińizdiń ne jep otyrǵanyńyzdy jáne odan aǵzańyzǵa qandaı paıda bolatynyn túsinýge kómektesedi. Sol kezde siz tamaqtanýdy jaı ǵana qaryn toıdyrý dep qaramaıtyn bolasyz. Zertteý nátıjeleri kórsetkendeı, tamaqtanýǵa osyndaı qadam jasaý kóńil kúıdi aıtarlyqtaı kóterip, kúızelis deńgeıin tómendetip, paıdaly tamaqtaný daǵdysyn qalyptastyryp, tipti artyq salmaqtan arylýǵa kómektesedi eken.

3. Kofeınge degen kózqarasyńyzdy ózgertińiz

Kofeın — sizdiń onsyz da juqaryp turǵan júıkeńizdi titirkendiretin yntalandyrýshy. Mazańyz bolmaı, toryǵyp otyrsańyz nemese ashýyńyz arnasynan shyǵaıyn dep otyrsa, ár shyny-aıaq kofe sizdi ýaqytsha ǵana sergitedi. Onyń ornyna sergýdiń jeńildeý jolyn qarastyryp, qýattanyńyz. Dene qımyldaryn nemese medıtasıa jasańyz.  Eger tańerteń kofe ishpeı, kóńilińiz kónshimese, onda bul sýsynǵa degen pikirińizdi basqasha ózgertińiz. Ony barynsha sanaly túrde jasańyz. Súıikti shyny-aıaqqa quıylǵan kofege qol sozyp, ıisin rahattana ıiskep, kofeniń dámine tamsanyńyz. Biraz ýaqyttan keıin bul nárse kofeniń ózinen de mańyzdyraq bolyp ketýi múmkin.

4. Toqtamastan qozǵala berińiz

Qozǵalys – kóńil-kúıdi kóterýdiń jáne kúızelisti tómendetýdiń eń kúshti emi ǵana emes, onyń eske saqtaýdy jáne jalpy oılaý daǵdylaryn jaqsartýdyń tıimdi ádisi ekeni dáleldengen. 

Eńseńizdi basyp turǵan kúızelispen dene belsendiligi arqyly kúresýge bolady: ıogaǵa, júgirýge nemese velosıped tebýge ketken árbir mınýt kúızelispen kúrestegi kishkentaı qadamdaryńyz.

Qarapaıym tańǵy jattyǵýdyń ózi kúni boıy sergek júrip, mańyzdy máselelerge kóńil bólýge kómektesedi. Tabysty adamdardyń kóbi tańǵy ýaqytta jattyqqandy jón kóretinin aıtýdyń ózi artyq. Kúnine eń bolmasa 10 mınýttan bastap aqyryndap jattyǵyp, onyń uzaqtyǵyn birtindep jarty saǵatqa deıin arttyryńyz.

5. Eń jaqsy demalys - tynyshtyq

Iá, ıá. Ómirdi ózgertý týraly bir de bir maqala medıtasıadan aınalyp ótpeıdi. Onyń shynymen de paıdasy bolsa, aıtpaı ketýge bolmaıdy ǵoı. Kúızeliske qatysty syrqattardan emdelý úshin dáriger qabyldaýynyń 80%-yna qanshama ýaqyt pen aqshańyz ketetinin eseptep kórdińiz be? Eń keremeti, osy shyǵyndardyń barlyǵyn durys medıtasıa arqyly qysqarta alady ekenbiz. Bul tájirıbe kúızelispen kúresýge kómektesip, ımýnıtetti nyǵaıtyp, uıqyny tynyshtandyryp, ózińizdi baqytty sezinýge kómektesedi. Kúnine bes mınýt medıtasıa jasasańyz, kúni kóńil-kúıińiz jaqsy bolady. Onyń taǵy bir artyqshylyǵy, únemi medıtasıa jasaıtyn adamdar ómirdiń qara jolaqtary kelgen kezde bárin aqylǵa salyp oılanyp, sabyr saqtaı alady.

6. Terińizge kútim jasańyz

Onyń esh qupıasy joq: terińiz nárli bolsa – ómirińiz sándi bolady. Árıne, bul ádetke daǵdylaný úshin de ýaqyt kerek. Munda áıgili úsh apta – turaqtylyq, júıelilik jáne túsiný degen ereje de mańyzdy emes. Óıtkeni kúntizbe kúnderin syzyp otyrǵannan da, muny ne úshin isteıtinińizdi túsiný mańyzdyraq. Qalyńdap jaqqan konsıler sharshaǵanyńyzdy áp-sátte jasyrǵandaı bolady.  Biraq shyn máninde terińiz ishteı, aqyryndap ózgere beredi. Sondyqtan kosmetıka bolsyn, tamaq bolsyn bet terińizdi jaqsartyp qana qoımaı, aǵzańyzǵa paıda ákeletinin tańdańyz. Qajetti rásimderdi erteli-kesh qaıtalap otyryńyz. Biraz ýaqyttan keıin bet terińizdiń jarqyrap, kóńil kúıińizdiń kóterilgenen baıqaısyz. Tym qarabaıyr sıaqty kóriner, biraq adamzat budan artyq eshnárseni áli oılap tappady.

7. Nápsińizdi emes, janyńyzdy baıytyńyz

Munyń da esh qıyndyǵy joq: ózińizge qýanysh syılaıtyn nárselerdi isteńiz. Turaqty jumys isteý paıdaly shyǵar. Biraq túptiń túbinde bul aǵzańyzdy bar kúsh-qýatynan aıyryp, qajytyp jiberedi. Júıeli demalys pen boı sergitýge qaraǵanda, budan keler paıda az. Ózińiz kópten beri qalap júrgen týflıińizdi satyp alyńyz, túski úzilis kezinde balmuzdaq alyp jeńiz jáne demalys kúnderi kúni boıy eski fılmderdi tamashalańyz. Osy áreketterdiń barlyǵynyń, jaraıdy kópshiliginiń delik, bir ǵana ózińizge qýanysh syılaý degen sebebi bolý kerek. Siz muny jumys tizimindegi kelesi is bolǵandyqtan istemeısiz. Tek ózińizdi qýantý úshin isteısiz. Bar bolǵany osy.

8. Túısigińizge senim artyńyz

«Júregim sezip tur» degen sóz jaı ǵana metafora emes. Mańyzdy sheshim qabyldar aldynda ishki sezimińizdi tyńdańyz: ádette bizdiń denemiz ózimiz túsinbeı turyp, bizge ne kerek ekenin aıtady. Sharshasańyz, úziliske shyǵyńyz. Janyńyz ózgeristi qalasa, basqa jaqqa baryp-kelińiz. Eger birnárse durys bolmasa, eń áýeli sebebin ózińizden izdeńiz. Eger siz túısiktiń adamy bolmasańyz, onda ishki daýsyńyzǵa qulaq túrýdi úırengenshe biraz ýaqyt kerek. Tek barlyq jumystardy ysyra turyp, azdap tynyǵyp alyńyz da, ózińizdiń qandaı sezimde ekenińizge shynaıy jaýap berińiz. Sol kezde ózińizge shyn máninde ne kerektigin jaqsy biletinińiz anyq bolady. Tek bir sát toqtap, ózińizdi tyńdaýyńyz kerek.

9. Qatyp qalǵan qaǵıdalardy buzyńyz

Aptasyna eń az degende bir ret ózińizge múldem beıtanys birnárseni baıqap kórýge tyrysyńyz. Al eger qulshynysyńyz artyp tursa, kúnine bir ret. Bárin birden ózgerte salý mindetti emes – mysaly, jaı ǵana jumysqa basqa jolmen baryńyz. Mundaı usaq-túıek sıaqty kórinetin nárseniń ózi erekshe tájirıbe. Ol oılaýdyń jańa ádisterine, qabyldaýǵa sanańyzdy ashýǵa kómektesedi. Al bul óz kezenide sizdi az da bolsa baqytqa bóleıdi.

10. Ózińizge jaıly orta qalyptastyryńyz

Barlyq durys qarym-qatynastardy qurýdyń birinshi kezeńi – óz ómirińizge kimdi jáne neni engizetinińizge jaýapty qadam jasaý. Iá, ómirińizdi qurtyp júrgen nárselerdi kóńil qýantatyn ári jaıly jaǵdaıǵa aınaldyrýdyń bolashaǵy sizdi azdap qorqytýy múmkin. Bul ásirese, dostyq, otbasy, tamaq, jumys nemese ózińizge qatysty bolsa. Biraq soǵan qaramastan, bul óte mańyzdy.

Barlyq baılanystaryńyzdy saraptap, olardyń óz ómirińizge jáne jaqsy kóńil-kúıińizge qandaı úles qosyp júrgenine kóńil aýdaryńyz.

Ortasyn tańdaýǵa jaýapkershilikpen qaraıtyn adamdar, sheshim qabyldaýda ózine senimdi bolady.

11. Jańa nárselerdi úırenińiz

Jańa bilim alý úrdisi sizdi qýanyshqa bóleıdi. Bul – aqıqat. Ol sizdiń ómir jasyńyzdy uzartyp, ony qyzyqty ári mazmundy etedi. Sondaı-aq, sizdi artyq qate túsinikterden artyltady. Azdan bastaǵyńyz kele me? Onda, mysaly, toqymany úırenińiz. Jelide ony úıretetin rolıkter óte kóp. Mundaı isti tipti, tósekten turmaı-aq úırenýge bolady. Al eger úlken maqsattarǵa umtylsańyz – veb-dızaın jasaýdyń úsh aılyq kýrsyna baryńyz. Nemen aınalyssańyz da, mıyńyz sizge alǵystan basqa eshnárse aıtpaıdy.

12. Kúndelik jazýdy qolǵa alyńyz

Boı sergitý, shyǵarmashylyq qabiletti damytý, ózińizge degen senimdilikti arttyrý jáne maqsattarǵa jetý úshin shabyttaný – qarapaıym ister bolǵanymen, paıdasy óte zor. Eger sizge aýyr tıetin bolsa, kúndelikti birnárse jazyp otyrý mindetin birden almańyz. Munymen qansha ýaqyt aınalysqanyńyz emes, mátin quraý úrdisiniń ózi mańyzdy. Sondyqtan, bul isti áýeli aptasyna birneshe ret qana qolǵa alsańyz jetkilikti. Taımer belgileńiz, ózińizge jeńil taqyryp tańdańyz. Mysaly, «Men bul kúnnen ne kútemin?». Sodan keıin oıyńyzda ne bar, sony jazyńyz. Kóp uzamaı kelesi jazba jazýdy taǵatsyzdana kúterińizge senimdimiz. 

Osy ádisterdi qoldanyp kórdińiz be álde sizge basqa nárse kómektese me? Pikir, almasyp, óz keńesterińizben bólisińizder.

---