Ispanıaǵa uzaq avtokólik saparyna shyqqan Qytaı azamattary Jambyl oblysynyń Talas aýdanynda qıyn jaǵdaıǵa tap boldy. Túnde sheteldikter joldan adasyp, kólikteriniń buzylýyna tap boldy, dep habarlaıdy infohub.kz saıty.
Saıahatshylar joldan adasyp qana qoımaı, dóńgelegin zaqymdap alǵandyqtan, ári qaraı júre almady. Beıtanys trassada kómeksiz qalǵan olar polısıaǵa júgindi.
«Polıseıler saıahatshylardyń qaýipsizdigin qamtamasyz etip, olarǵa ystyq shaı men tamaq usyndy. Sonymen qatar, olar evakýator shaqyryp, kólikti jaqyn mańdaǵy servıstik ortalyqqa jetkizýge kómektesti», – dep habarlady vedomstvodan.
Sheberhanada zaqymdalǵan dóńgelek sátti aýystyryldy. Avtosaıahatshylardy jibermes buryn, tártip saqshylary olardyń navıgasıalyq baǵytyn túzetip, qajetti trassaǵa qalaı shyǵý kerektigin túsindirdi.
Qytaı azamattary qazaqstandyq polıseılerge jedeldigi, qonaqjaılylyǵy men qamqorlyǵy úshin shyn júrekten alǵys bildirip, sodan keıin Eýropaǵa saparyn sátti jalǵastyrdy.
Buǵan deıin Qarqaraly memlekettik ulttyq parkiniń Komısarovka shatqaly aýdanynda qutqarýshylar 1967 jáne 1963 jyly týǵan eki sańyraýqulaq terýshini tapqan bolatyn. Kúndiz olar sańyraýqulaq terýge baryp, adasyp ketken.