Qyzylordada bir top júrgizýshi ınternetke taraǵan beınejazbadan keıin jaýapkershilikke tartyldy. Kadrlarda avtokólik ıeleri manevr jasaý erejelerin jáne jol júrisiniń basqa da normalaryn buzǵany kórinedi, dep habarlaıdy infohub.kz saıty.
Polisia.kz-tiń habarlaýynsha, buzýshylar polısıa qyzmetkerleriniń áleýmettik jelilerdi baqylaýy barysynda anyqtalǵan. Beınejazbada birneshe júrgizýshi qala aýmaǵynda kortej uıymdastyrǵany kórsetilgen. Olar jol júrisi erejelerin elemeı, manevr jasaý jáne avarıalyq sıgnaldy paıdalaný tártibin buzǵan, sondaı-aq memlekettik tirkeý nómirlerinsiz kólik quraldaryn basqarǵan.
Vedomstvonyń málimetinshe, oqıǵaǵa qatysýshylardyń barlyǵy anyqtalyp, polısıaǵa jetkizilgen. Olar Qyzylorda turǵyndary, jastary 20 ben 35 aralyǵynda. Quqyq buzýshylarǵa qatysty qoldanystaǵy zańnama aıasynda sharalar qabyldandy. Bir kólik arnaıy turaqqa qoıyldy.
İshki ister mınıstrligi polısıa áleýmettik jelilerdi baqylaýdy jalǵastyryp jatqanyn jáne mundaı faktilerdiń eshqaısysy nazardan tys qalmaıtynyn atap ótti. Árbir quqyq buzýshylyqqa tıisti quqyqtyq baǵa beriledi. Vedomstvo azamattardy jol júrisi erejelerin qatań saqtaýǵa shaqyryp, joldyń júrý bóligin jabý, dybystyq sıgnaldy zańsyz paıdalaný nemese qaýipti manevrler jasaý — bul zańǵa qaıshy áreketter ekenin jáne mindetti túrde jaýapkershilikke ákep soǵatynyn eskertti.