Jetisý oblysyndaǵy Sarqan qalasynyń turǵyndary aýyz sýdyń sapasyna shaǵymdanýda. Jańbyrdan keıin sý qubyrynan laı sý aǵyp, ony ishýge jaramsyz dep otyr, dep habarlaıdy infohub.kz.
Qala turǵyndary sýdy úlken ydystarǵa quıyp, tundyrýǵa májbúr ekenderin, biraq sodan keıin de onyń jaramsyz ekenin aıtady. Kópshilik bótelkedegi sýdy satyp alýda.
Oblys ákimdigi aýdan ortalyǵynyń sýyn taý muzdyqtarynan qorektenetin Sarqan ózeninen alatynyn túsindirdi. Jazda 40–50 gradýs ystyqta sý deńgeıi kúrt kóterilip, bul laılanýǵa ákeledi. Sonymen qatar sý tutyný qysta 5–6 myń tekshe metrden jazda 20–30 myń tekshe metrge deıin artyp, sý tolyq tunyp úlgermeıdi.
Máseleni sheshý úshin 2024–2025 jyldary jumystar júrgizildi: bas sý alý qondyrǵysy jóndeldi, sý qabyldaý baseıni keńeıtildi, sý tartý qubyrlary aýystyrylyp, ulǵaıtyldy, jaǵalaý syzyǵy nyǵaıtyldy, 1,2 shaqyrym sý qubyry jelisi jańartyldy, rezervýar, shaıma júıesi jáne avarıalyq sý burý júıesi qaıta jańǵyrtyldy. Sondaı-aq jalpy syıymdylyǵy 3750 tekshe metr bolatyn úsh tundyrǵysh kúrdeli jóndeýden ótti.
Vedomstvo mamandary jańǵyrtý tazartý tıimdiligin ótken jyldarmen salystyrǵanda 70–80% deıin arttyrǵanyn atap ótti. Alaıda bıylǵy jazda ózendegi sý deńgeıi 25 jyl ishindegi eń joǵary mánge jetip, laılyqty kúsheıtti. Tundyrǵyshtardy tazartý jáne jelilerdi shaımalaý kezinde turǵyndarda ýaqytsha laı sý saqtalýy múmkin.
Ákimdik tundyrǵyshtardy tereńdetý, arnany keńeıtý jáne súzgi stansıasyn ornatý arqyly máseleni túpkilikti sheshýdi josparlap otyrǵanyn qosty. Osy sharalardan keıin aýyz sýdyń sapasy aıtarlyqtaı jaqsarýy tıis.