Almatydaǵy balalar shuǵyl kómek ortalyǵynda bir túngi aýysymda hırýrgter úsh shuǵyl operasıa jasap, kishkentaı pasıentterdiń asqazan-ishek jolynan magnıttik sharlardy alyp tastady. Balalardyń jasy ekiden tórtke deıin, barlyǵyna ishek tesilý qaýpi tóngen edi, dep habarlaıdy infohub.kz.
Sol kúni alǵashqy bolyp ishi aýyryp, eki jasar sábı tústi. Últradybystyq zertteý kóptegen bógde zattardyń bar ekenin kórsetken soń, dárigerler dereý ota jasaýǵa sheshim qabyldady. Operasıa barysynda balanyń denesinen 25 magnıt alyndy.
Birneshe saǵattan keıin ortalyqqa eki jarym jasar taǵy bir bala jetkizildi. Onyń qusýy men ishi aýyrǵan. Shuǵyl ota kezinde hırýrgter toǵyz magnıtti alyp tastady.
Sol aýysymnyń tańyna qaraı dál osyndaı belgilermen tórt jasar pasıent keldi. Alaıda onyń ishegindegi magnıtter sany áldeqaıda kóp bolyp, dárigerlerdi tańǵaldyrdy.
«Bul shok boldy. Biz balanyń jińishke isheginen 59 magnıt aldyq. (...) Bul aýysymdaǵy eń kúrdeli operasıa boldy», — dedi hırýrg Aıbol Sultanbekov.
Almaty qalalyq densaýlyq saqtaý basqarmasynyń málimetinshe, jyl basynan beri ortalyqqa osyndaı dıagnozben 15 bala túsken, olardyń barlyǵy magnıt jutqan. Dárigerlerdiń aıtýynsha, qaýip magnıtterdiń dene ishinde bir-birine tartylyp, aýyr zardaptarǵa ákelýinde.
Medıkter qazaqstandyqtardy magnıttik sharlar men quramynda magnıti bar basqa da oıynshyqtardy balalardyń qoly jetpeıtin jerde saqtaýǵa jáne balanyń nemen oınaıtynyn muqıat qadaǵalaýǵa shaqyrady.
Buǵan deıin Almatyda bir bala úsh magnıt jutyp, operasıa ústeline túskeni habarlanǵan bolatyn.