Mańǵystaý oblysynda 150 tósektik aýrýhana, aýyldyq jerlerde tórt dárigerlik ambýlatorıa jáne balalar ońaltý ortalyǵy qosa alǵanda, jańa medısınalyq mekemeler paıdalanýǵa berildi, dep habarlaıdy infohub.kz saıty.
Aýrýhana Munaıly aýdanynda ornalasqan. Ǵımarattyń aýdany 30 myń sharshy metrdi quraıdy. Mekeme qajetti jabdyqtarmen jaraqtandyrylǵan.
Taǵy tórt ambýlatorıa «Aýyldyq densaýlyq saqtaýdy jańǵyrtý» jobasy aıasynda salyndy. Olar Appaq (Qaraqıa aýdany), Qosbulaq (Mańǵystaý aýdany), Tajen (Beıneý aýdany) jáne Kenderli (Jańaózenge qarasty) aýyldarynda ornalasqan.
Ambýlatorıalarda kúndizgi stasıonarlar, zerthanalar, fıltr-bokstar, dárigerge deıingi kómek kabınetteri, fızıoterapıa, emdik dene shynyqtyrý jáne akýsherlik kabınetter qarastyrylǵan. Turǵyndar munda alǵashqy medısınalyq kómek ala alady, dıagnostıka men emdelýden, sondaı-aq qalpyna keltirý prosedýralarynan óte alady.
Beıneý aýdanynda erekshe qajettilikteri bar balalarǵa arnalǵan «Qamqorlyq» ońaltý ortalyǵy jumysyn bastady. Ol jylyna 600 balaǵa deıin qabyldaýǵa eseptelgen. Ortalyqta balanyń jeke qajettilikterin eskere otyryp, 14 kúndik keshendi ońaltý kýrstary ótkiziledi.
Densaýlyq saqtaý mınıstrliginde jańa nysandar aımaq turǵyndarynyń, onyń ishinde aýyl turǵyndary men balaly otbasylardyń medısınalyq kómekke qoljetimdiligin keńeıtýi tıis dep atap ótti.
Buǵan deıin Densaýlyq saqtaý mınıstrliginiń eldegi 32 aýdandyq emhanany qaıta jaraqtandyrý jospary týraly habarlanǵan bolatyn.