Mańǵystaý oblysynda Jańaózen qalalyq kópsalaly aýrýhanasyna demeýshilik kómek retinde bólingen qarajattyń jymqyrylýy tergelýde. Bul týraly infohub.kz saıty habarlaıdy.
Qarjylyq monıtorıń agenttiginiń Mańǵystaý oblysy boıynsha departamentiniń resmı Telegram-arnasynda málim etilgendeı, 2025 jyly Mańǵystaý oblystyq densaýlyq saqtaý basqarmasy «QazMunaıGaz» UK» AQ-na kúıik bólimshesin ashýǵa demeýshilik kómek kórsetý týraly ótinish bildirgen. Jobany júzege asyrýǵa 223 mln teńge bólinip, ony «OzenMunaıGaz» AQ «Jarylqaý» qoǵamdyq qoryna aýdarǵan.
Bastapqyda joba segiz túrli medısınalyq jabdyqty satyp alýdy jáne mamandardy oqytýdy kózdegen. Alaıda keıin onyń sharttary ózgertilip, bólimshedi keshendi jabdyqtaýdyń ornyna qoǵamdyq qor, qalalyq aýrýhana jáne «AKBS Invest» JSHS arasynda quny 210 mln teńge turatyn eki ǵana kúıikke qarsy tósek satyp alýǵa úshjaqty shart jasalǵan.
Sonymen qatar, QMA-nyń málimetinshe, satyp alý osyndaı qundaǵy medısınalyq tehnıkany Biryńǵaı dıstrıbútor arqyly alýdy talap etetin zańnama talaptaryn aınalyp ótip júrgizilgen.
«Tergeý derekteri boıynsha, quqyqqa qaıshy sqemaǵa qalalyq aýrýhana dırektorynyń orynbasary, «Jarylqaý» qoǵamdyq qorynyń jetekshisi, Jańaózen ákiminiń burynǵy orynbasary jáne jetkizýshi qatysqan. Jabdyq satyp alýǵa 92 mln teńge ǵana jumsalǵan. Qalǵan soma tergeý nusqasy boıynsha affılıırlengen kásiporyndar arqyly qolma-qol aqshaǵa aınaldyrylyp, sqemaǵa qatysýshylar arasynda bólingen», — dedi vedomstvoda.
QMA dereginshe, «AKBS Invest» JSHS ókili qylmystyq jolmen tapqan kirisine astanadan páter satyp alyp, ony úshinshi tulǵalarǵa rásimdegen.
Jańaózen ákiminiń burynǵy orynbasaryna qatysty Qazaqstan Respýblıkasy Qylmystyq kodeksiniń 361-baby boıynsha laýazymdyq ókilettigin asyra paıdalaný faktisi boıynsha tergeý bastaldy.
Úsh kúdikti qamaýǵa alyndy. Sottyń sanksıasymen olardyń múlkine, onyń ishinde 3 páter, 2 turǵyn úı jáne bir avtokólikke tyıym salyndy. Tergeý jalǵasýda.