Qazaqstan Densaýlyq saqtaý mınıstrligi medısına qyzmetkerleriniń ómiri men densaýlyǵyn saqtandyrý tetikterin jetildirýdi usyndy, dep habarlaıdy infohub.kz saıty.
Buıryq jobasy «Ashyq NQA» portalynda jarıalandy. Qujatta ózgeristerdiń negizgi maqsattary — medısına qyzmetkerleriniń jaýapkershiligin saqtandyrý tetikterin jetildirý, sondaı-aq olardyń kásibı mindetterin oryndaý kezinde ómiri men densaýlyǵyn saqtandyrý ekeni atap ótilgen.
«Buıryq jobasynda medısına qyzmetkerleriniń kásibı mindetterin oryndaý kezinde olardyń ómiri men densaýlyǵyn birlesip saqtandyrýdyń úlgilik shartyn engizý, sondaı-aq ıntern-dárigerler men rezıdent-dárigerlerdi oqý kezeńinde kásibı jaýapkershilik bóliginde saqtandyrý qorǵanysyn keńeıtý kózdeledi», — delingen jobada.
Sonymen qatar, medısına qyzmetkeriniń kásibı mindetterin oryndaý kezinde úshinshi tulǵalardyń zorlyq-zombylyq áreketteri saldarynan onyń ómiri men densaýlyǵyna zıan keltirilgen jaǵdaılarda saqtandyrý tólemderin júzege asyrý jaǵdaılaryn aıqyndaý usynylady.
Sondaı-aq jobada saqtandyrý tólemderin júzege asyrý tártibin jáne densaýlyq saqtaý sýbektileri, medısına qyzmetkerleri, pasıentter men biryńǵaı saqtandyrý (qaıta saqtandyrý) pýlynyń ákimshisi arasyndaǵy ózara is-qımyldy jetildirý kózdelgen. DSM pikirinshe, jańa erejeler medısına qyzmetkerleriniń áleýmettik jáne quqyqtyq qorǵalýyn arttyrýǵa, olardyń kásibı jaýapkershiligin saqtandyrýdy jaqsartýǵa, sondaı-aq medısınalyq qyzmet nátıjesinde pasıentterdiń ómirine nemese densaýlyǵyna zıan keltirilgen jaǵdaıda olarǵa saqtandyrý tólemderin qamtamasyz etýge tıis.
Joba 16 qyrkúıekke deıin qoǵamdyq talqylaýda. Eske salaıyq, 7 naýryzda Qazaqstanda medısına qyzmetkerlerine qatysty fızıkalyq zorlyq-zombylyq pen qorqytý úshin jazany qatańdatý boıynsha Qylmystyq kodekske ózgerister kúshine endi.