Áleýmettik jelilerde Astanadaǵy bir mektepte oqýshylardyń ata-analaryn shalbardyń «durys emes» túsi úshin aıyppulmen qorqytqany týraly aqparat tarady. Oqıǵa oqý jylynyń alǵashqy kúni, 2026 jylǵy 2 qyrkúıekte bolǵany aıtylady, dep habarlaıdy infohub.kz.
Threads platformasynyń qwerty.123.01 atty qoldanýshysy óz balasyn qara shalbar kıgeni úshin úıge jibergenin jazdy. Onyń aıtýynsha, balanyń shalbary qoıý kók emes, qara tústi bolǵan. Avtordyń sózinshe, mektep dırektory ata-anaǵa qońyraý shalyp: «Kelińiz, aıyppul tóleısiz», — degen. Sondaı-aq, bul shalbardy bala ótken jyly da kıgen, al dırektor sol kúıinde qalǵany aıtylady.
Astana qalasy ákimdiginiń bilim basqarmasy bul aqparatty joqqa shyǵardy. Vedomstvonyń málimetinshe, elordanyń jalpy bilim beretin mektepterinde qara jáne qoıý kók tústi mektep formasyna ruqsat etilgen. «Atalǵan mektep oqýshylarynyń ata-analaryna mektep formasynyń túsi úshin aıyppul salynady degen aqparat shyndyqqa sáıkes kelmeıdi. Mektep ákimshiligine pedagogtar men ata-analar arasynda túsindirý jumystaryn júrgizip, mektep formasyna qoıylatyn talaptardy burmalaýǵa jol bermeý tapsyryldy», — dep habarlady basqarmada.