Almatydaǵy Naýryzbaı aýdandyq soty «Nur-Muqasan» tobynyń múshesi Azamat Eserkenovke qatysty úkim shyǵardy. Ol Muqasan Shahzadaevtyń úıinde ánshi Ǵalymjan Súleımendi uryp-soqqan. Bul týraly infohub.kz habarlaıdy.
14 shildede ashyq sot otyrysy ótti. Oǵan hatshy J. Dáýletqul, memlekettik aıyptaýshy prokýror B. Júnis, jábirlenýshiniń advokaty A. Janysov jáne sottalýshynyń qorǵaýshysy S. Ýsýpjanov qatysty. Otyrys barysynda is materıaldary tolyq qaraldy.
İs materıaldaryna sáıkes, oqıǵa 2025 jylǵy 20 qarashada túske taman Almaty qalasynyń Qalqaman-2 shaǵyn aýdanyndaǵy Saýryq batyr kóshesinde ornalasqan Muqasan Shahzadaevtyń úıinde bolǵan. Sol kúni úı ıesi men jábirlenýshi Ǵalymjan Súleımen araq-sharap ishken. Saǵat 13:00 shamasynda olarǵa ánshiniń ákimshisi Azamat Eserkenov jáne taǵy bir tanysy B. Qoısoımasov qosylǵan.
Mastyqtan Ǵalymjan Súleımen qatysýshylardy boqtap, olardyń namysyna tıgen. Sodan keıin úı ıesi oǵan ketýdi usynǵan. Azamat Eserkenov jábirlenýshini aýladan ıterip shyǵarǵan, biraq ol qaqpany uryp, aıqaılap, balaǵattaı bergen. Jábirlenýshi qaqpany qaıta ashqan kezde, Azamat Eserkenov onyń beti men basyna birneshe ret soqqy salǵan.
Sot Azamat Eserkenovty Qylmystyq kodekstiń 108-1-babynyń 1-bóligi boıynsha (densaýlyqqa qasaqana jeńil zıan keltirý) kináli dep taýyp, 20 aılyq eseptik kórsetkish mólsherinde aıyppul saldy. Úkim boıynsha, kináli bir aı ishinde memlekettik búdjetke 86 500 teńge tóleýge jáne jábirlenýshilerge ótemaqy qoryna qosymsha 19 660 teńge aýdarýǵa mindetti.