Atyraý oblysynda munaı kompanıasy ekologıalyq zańnamany birneshe ret buzǵany úshin ákimshilik jaýapkershilikke tartyldy, dep habarlaıdy infohub.kz saıty.
«Aq Jaıyq» basylymynyń málimetinshe, jergilikti «Potensıal Oıl» JSHS-ne Atyraý oblysy boıynsha ekologıa departamentiniń tekserýi qorytyndysy boıynsha 1,4 mlrd teńgeden astam aıyppul salynǵan.
Ekoınspektorlar birqatar eleýli buzýshylyqtardy anyqtady: tıisti óndiristik ekologıalyq baqylaýdyń bolmaýy, aǵyndy sýlardy monıtorıńileý kezindegi buzýshylyqtar jáne eseptilik usynýdaǵy aqaýlar, ruqsat etilgen shyǵaryndylar normatıvteriniń asyp ketýi jáne ekologıalyq ruqsattarsyz jumys isteý, sondaı-aq topyraqtyń munaı ónimderimen lastanýy jáne qaldyqtarmen jumys isteý erejeleriniń saqtalmaýy.
«Salynǵan ákimshilik aıyppuldardyń jalpy somasy 1 mlrd 433,8 mln teńgeni qurady. Qazirgi ýaqytta kásiporyn nebári 21,9 mln teńgeni tólegen. Qalǵan 1 mlrd 411,9 mln teńge kólemindegi aıyppuldy kompanıa daýlaýǵa tyrysqan. Alaıda birinshi jáne apelásıalyq satydaǵy sottar ekologtardyń jaǵyna shyǵyp, «Potensıal Oıl» JSHS-niń shaǵymdaryn qanaǵattandyrýsyz qaldyrdy», — delingen materıalda.
Vedomstvo kásiporyn zańda belgilengen merzimde qaryzdy ótemese, qaýlylar májbúrlep óndirip alý úshin sot oryndaýshylaryna jiberiletinin eskertti.