Jambyl oblysynda er adam óz erkimen muradan bas tartqan, alaıda alty jyldan keıin sol sheshimin sot arqyly daýlaýǵa árekettengen — marqum aǵasynyń áıeline qoıylǵan talap-aryz qanaǵattandyrylmady, dep habarlaıdy infohub.kz saıty.
Jambyl oblysy sottarynyń resmı Telegram-arnasynda jazylǵandaı, Shý aýdandyq soty er adamnyń marqum aǵasynyń áıeline qoıǵan, óziniń muradan bas tartýyn jaramsyz dep taný týraly talap-aryzy boıynsha azamattyq isti qarady.
2020 jyldyń aqpanynda talap qoıýshynyń ákesi qaıtys bolǵan soń turǵyn úı, jer telimi jáne «VAZ-21093» kóligi túrindegi mura qaldy. Talap qoıýshy men onyń qaryndasy muradan aǵasynyń paıdasyna bas tartty. Aǵasy ony qabyldady, biraq ómirinde muraǵa quqyq týraly kýálikti rásimdeýge úlgermedi.
2026 jyldyń naýryzynda aǵasy qaıtys boldy. Osydan keıin talap qoıýshy sotqa júginip, muradan bas tartqan kezde onyń saldaryn túsinbegenin, notarıýs múlikti rásimdeý tártibin durys túsindirmegenin málimdedi.
Talap qoıýshy sondaı-aq 2010 jyldan beri ákesiniń úıinde turyp, ony kútip ustaıtynyn, jóndep, abattandyratynyn aıtty.
Sot 2020 jyly talap qoıýshy notarıýsta aǵasynyń paıdasyna muradan bas tartý týraly ótinishke jeke ózi jáne óz erkimen qol qoıǵanyn anyqtady. Notarıýs bas tartýdyń saldary tolyq túsindirilgenin rastady.
Sot talap qoıýshy notarıaldyq áreket jasaý kezinde aldaý, májbúrleý nemese adasýshylyq faktilerin dáleldeıtin dáleldemeler usynbaǵanyn atap ótti. Óz sheshimin ózgertý muradan bas tartýdy joıýǵa negiz bola almaıdy.
Sonymen qatar, aǵasy qaıtys bolǵannan keıin birinshi kezektegi muragerler onyń áıeli, 2 kámeletke tolmaǵan balasy jáne anasy boldy. Talap qoıýshy marqumnyń aǵasy retinde ekinshi kezektegi muragerler qataryna jatady.
Sot sheshimimen talap-aryzdy qanaǵattandyrýdan bas tartyldy. Talap qoıýshydan jaýapkerdiń paıdasyna zańgerlik kómekke jumsalǵan 200 myń teńge óndirildi. Sheshim zańdy kúshine engen joq.